TYAJIL TNAM MAM

Aqe xjal Mamqe jun ch'uq tnam ite'ka ex tzajneqe ti'j jun ttxu aj ojtxe ky-yajel, ja o chi jaw ch'iya junx ex nkub' kyp'an toj nab'l, kychwinqal ex tzunx nchi nkub' kypa'n junx kytx'otx', ky-yol, tzenx toka kynab'l ex txqantl. Tumpitzintzjo jun elninqe ti'j junx ttxu ky-yajil Protomaya. Q'anchalxixsin tzen njaw kyb'inchin kyib', ti'j noq tichaq il ntzaj, tichaqku nb'aj, ex tichaqku nkub' kyb'inchen ex nb'ant teyele junjen xjal.

A twutz tnam xjal Mam o jaw kyb'inchen junx kychinqal, ex tzenkux kyten twutz tx'otx', tuk'a Qman Qajwa, kyxolilex kyxjalil ex tuk'a junxel xjal te junxel tnam.

Atzin t-txolil kynab'l junx toka ja nkux aweta kyb'is ex kychwinqal, jun oyajtzin kyijq'on kyu'n ojtxex ta'xha mo qyajel Mam.

Te kypon kanen mo's jun yajb'iltzin pon kyin ti'j tb'anel kyipb'el, kyaq'en ex ch'isb'el kynab'l tyajel xjal Mam ex txqan b'is ku'x ti'j kyanmen te ky-kyim tb'anel tnab'l qyajil xjal exsin aye mo's nchi ipen tu'n tkub' b'aj ky-yol, b'inchenkutzin kyt'en, tumel kynab'l ex txqantl. Toj kychwinqal, nimx b'is ex il q'in kyu'n ja iky'inqe ky-yajel, kyt'en twutz tnam ex tqantl. Me tzunxsin n-chi ipen kyib' tu'n kyanq'en jalen ex nchi ch'isenen kyib' te jun chi'j toj tb'anel, cheb'aku n-ok kyb'inchen kyib' tzenx taya ychwinqlal twutz tnam.

A tb'anilxix n-el jyet ti'j twutz tyajil tnam Mam, tu'n itz'xix twutz ky-yol japitzintzjo ntzaj tyek'ina tq'inemel twutz jun tnam.

MU'XH NAB'LIL KYCHWINQLAL XJAL MAMQE

Tzenkuxjo o xh-chuq'et tib'aj kyxhwinqlal tib'aj tnam Mam tu'n aj tz'ib'al F.A. Fuentes ex Guzmán, tzuntzin ntzaj kyq'ma'n tib'aj ajq'ojen kyun xjal Kyiche ky'ij tnam xjal Mam. Jun q'ojen ja tu'n kykamena tij jnilexjo attaq kye, kytx'otx' ex kytentaq, noqtzin tu'n kych'iy kyten xja Kyiche. A ojtxixex wen a ttziyela ttxu a' te mb'laj mo ja nkub'a q'ij, qapa junxtaq taya kynajb'íl, kyten ex ky-yol tuk'a Pokomam; aqe ch'uq xjal b'exsin y etz lijo'n ti'j kytx'otx' kyu'n Pipiles ex kyu'n xjal Kyiche i jyon q'oj tib'ajxa twi' wutz te tx'otx te paximel ja b'ex i-tzaj lejona ti'j kytx'otx' ex b'exsin ok kyetzb'en tnam Kyiche te kytx'otx' junx kuk'a Kakchikel a najleqe elnex te tnam Kiche tumel tnam te Santa Lucía Cotzumalguapa. A txilnenxix tzuntzin ntzaj tq'ma'n kye tnam Mam b'exsin i-etz lejón kyu'n tnam Kyiche ja najleqetaq tzenkutzin tnam te Kujula, te tnam te Txelja ex Otzoya te Totonicapan. Jun kynab'l tnam kye Kyiche, tz'ib'enku toj u'j te kyb'ib'etz tnam te Paxemel ja ntzaj tuxinxix mo ntzaj tq'man ja kub' kynajana tyajel Mam tx'otx' a tnam te Kakya ex aye PokoMam a tnam te Chua, Tinamit, Kukultan, Chuxaro, Pasoos ex Wirixh Kukmula. Tzuntzin ntzaj tq'ama´n te namtaq kypon kanen kyxhtyan elq'el kytx'otx' a jnilexjo tx'otx' tkub'ekux tzmax nmb'laj exsin njapinxix tzmax toj tnam te Txelja exsin tzmax tib'aj wutz te tnam te Huehuetenango me b'exsin ok kyetzb'en aj Kyiche kytx'otx' xjal Mam, a jnilexjo t-tx'otx'il tnam te Txelja.

Toj junxil tumel tu'n ajtz'ib'el Girad (1,988) tzuntzin nntzaj tq'man a kynajb'el tnam te Man te namtaq kypon kanen kyxhtyan twutz toj ttx'otxil Paximel, aqetzin tnam te Mam ex PokoMam exqe Pipiles b'exsin i-etz lejo'n ti'j kytx'otx' kyun Kyiche a nejantaq kyu'n tnam Mam a twutz ttx'otx' nb'laj exsin. Q'anchalxixtaq qa ch'ima ikyx ynab'l tuk'a PokoMam tzuntzin ntzaj tq'man aye tnejil qxjalil twutz tx'otx' te Paximil, exsin tzuntzin ntzaj q'man aye tnam xjal Mam nimxixtaq kytx'otx' ja toj kywutz Kyiche nimxextaq tx'otx' te jun jteb'en xjal, qu'n toj kywutz ajkyiche noqtla junjteb'en pixh tx'otx' te kyanq'b'el. Tumpitzintzjo b'ex ok muxhsin kytx'otx' tnam Mam. Tetzin kykub' tu'n tnam kyiche b'exsin ixi' laq'e tib'aj wutz tx'otx'ja najleqa jalen.

MU'XH YOLB'IL TIB'AJ TB'I TNAM TE TXOLJA

a) TNEJIL XJAL NEJAB'IL TWUTZ TTXO'TX'IL TXOLJA.

Nlay b'ant tkub' chiky'b'etxix ja tzaje xkyeya tnejil tyajil tnam te Txolja, me twutzxix te namtaq kyul kyxhtyan toj tx'otxil paximel, otaq nejettaq twutz tx'otx kyu'n tnam Mam. Toj yek'b'il twutz tx'otx' te Paxemel, Txolja chiky'b'enkux toj techb'il tx'otx' a kojb'el te ÒT-txan Tx'ipelÓ tzuntzin ntzaj tq'man ja tzaja xkyeya tnejil tyajil tnam Mam te ojtxixix. Qapa antza tzaja xkyeya tnejil tyajil tnam Mam de tnam te Txolja.

Ja toka ttx'otx'il kojb'el te T-txan Tx'ipel, okne taya te tnam te Txolja ex wuq kilómetro taya te tnam. Tzmaxix jalin nti'x jun txilnen mo jun chiky'b'elte ja tzaja xkyeya txilnen tb'i kojb'il, kyaq'entzin xjal tu'n txi xhchuqet tzenxix taya tuntzin tkyij q'uqb'et ex chiky'b'et txilnen.

Toj junxel tq'umetz kyu'n xjal, aj ojtxe tib'aj ja tzaja xkyeya tnejil tyajil tnam te Txolja. Tzuntzin nkub' q'ma'n toj yolb'in, kye a twi' wutz te Tzma toj Ch'ech' antzi tzanjnixa tenjil tyajil tnam qxjalil te Txolja, atzintza tzaja xkyeya txe wutz tejo kojb'il, ex ja ntzaja xkyeya tqan a' mo ja ntzaja anq'ene tlok'lel a' toj Ch'ech ex txe tqan oknen taya te tnam te Txolja.

Ex tzun n-okan te twi' tz'unin wutz, qu'n kyun xjal tu'n nimx toklen wutz kye ojtxex xjal ex te tnam te Txolja, jatzin nkub' q'mana qa antza tzaja xkyeya tnejil tyajil tnam Mam. Kujch'in taya tu'n txi chiky'b'etxix alkyexix txilnen qyolb'in b'an tu'n toqen te jaxix tzaja xkyeya tyajil tnam.

Toj junxil txilne q'manku kyun aju'jel aye b'inchel kawel tnam toj ab'qa 1,994, aye klol xjal tzuntzin kyq'man kye a tnam te Txolja otaq nejet kyun tnam Mam te namtaq kypon kanen kyxhtyan elq'il kytx'otx' toj ab'q'a 1,963 ex tzuntzin kub' kyq'man a tyajil tnam tzajnex te tnam te Zaculeu.

b'). TB'I TXOLJA

Toj ab'q'a 1,976 a tata ajtz'ib'el Gall ntq'man ti'j tnam te Txolja jun najb'el q'onj kyu'n ojtxa xjal, ja nyolina tib'aj tnam te Txolja najb'el ja i anq'ene ex nejana tnejel tyajil tnam Mam te Txolja, qun ikytzin kyij kyq'man ojtxa xjal, a tal twi' wutz ja b'inchicu tja Dios kyu'n Katolik. Tzuntzin tzaj q'man, ataqtzin najb'iljo te nab'l Qajwa kyu'n qchma'n te tnam te Txolja, te namtaq kyul kyxhtian toj tnam te Txolja. Toj ab'q'a de 1,633 ex tzenkujo nkub' q'man nab'l chwinqlal. Tzuntzin nkub' yolin, tib'aj twi wutz jaw anq'en jun yuxh tze, tu'npitzin kyij q'on kyu'n ojtxe xjal a tb'i tnam Txolja tzenkux tb'i jalin.

Toj junxil tumel nkub' q'man kye, aye kyxhtyan ok q'onte tb'b'i tzenkux tb'i jalen. Tu'n ipon kanen toj tnam toj tajlal ab'q'e ex xjaw toj toxen q'ij te te tjweyen xjaw, tojxix tq'ijel xjaw nim q'ij te tanam te Txolja.

Toj junxel tq'mab'etz kyu'n xjal, a tten Tzolja ikyxixjo tzenco jun yuxh tze ex qapa antza jaw anqene tb'i tnam te Txolja.

Toj junxil tq'mab'etz tzuntzun nkub' na'yet tzenkuxjo nkub' yolit kyu'n ojtxa xjal ex te ajchq'ajlajqa el jyet jun tyuxh tze kyun twi wutz ja b'inchina tja Dios jalen kyu'n katolik ex apitzin tq'uqel ex toj tmux tnamjo te Txolja. Apitzin yuxh tze ktxunktaq tun jun tij kampan a tzun ntzlinex qniky'in ex q'ijl me mina n-ok kyq'on kywi' ti'j aye najleqetaq txlaj. Qu'n tuntzin toj kywutz xjal kapa k'walqetaq nchi saqchan antza ja ntzinetaq kampan.

Me pon kanex tq'ijel ja iky'a jun jteb'en xjal aj chq'ajlaj lolte titaqtzin nb'aj, i xi laq'etzin kayilte jan ntzlinetaq kampan me nok pon takpaj tuk'a jun yuxh tze tb'anelx wen q'ejlextaq ti'j jun tij tqan tze tzuntzun nkub' yolin kye ktxunkutaq tu'un jun tij kampan; aye xjal i lonte b'exsin tzaj tchewil kyij ex b'exsin i jaw xob' me b'exsin xi kyq'on tqanel kye jnilexjo xjal najleqe toj kojb'el tx'otx' te Chq'ajlaj, me kyexix tij xjal xiya tqanel qun tu'n ayixixtzin xjaljo niminku kyu'n tnam exqa chm'an xjal ajq'ij, ayintzin xjaljo jqonxix kynab'l ex tb'anil kynab'l, me ayintzin ajq'ij ixi' jqol b'e tzenxix taya, ja b'ex ixi' patil pon tib'aj jun wutz ja nche'xitaq xjal n'al Qajwa. B'exsin xi kyin tze yuxh tzmax ja nkub' b'inchena nab'l Qajwa tzmax tib'aj wutz te kojb'el te Chq'ajlaj, tepitzintzjo tkamet me nimxixsin tzalb'aj jaw toj kyanmen xjal exsin kub' iky'sit tuk'a jun nim q'ij te jotx xjal te kojb'el te Chq'ajlaj ex jotxsin b'ex i-meltz'aj toj kyja, qun b'ex kyij kyq'uqb'en kyk'uj ti'j yuxh tze jaxjo xkyij kyq'ona, me toj junxil q'ij te kyxi' lolte otaq txi' naj b'exsin xi joyb'aj ja b'e'x jieta jaxjo tayataq mo jaxjo ok jieta, me b'ex xi kyin juntl maj jaxjo kyajtaq xjal tu'n tkub' tena yuxh tze, me ikyx b'ajljo tky'exta yuxh tze tu'n tkub' tentaq ja kyajtaq xjal tu'n tkub' tena tumpaj cheb'a kyij k'lona tu'n aqwil ex kaden qu'n tu'n nimtaq kyxob'il tu'n txi najtl juntl maj, me b'exsin jaw kyb'inchen xjal jun tja ja tu'n tkub' tena tuntzin kykyij wen twutz yuxh tze, me ikyx b'ajo. Me jotxsin jniqe xjal ok kychmo'n kyib' tu'n tkub' ximitixix ti'jo jnijo nb'aj, me jotx jaw melj ex tzaj pax kyanmen qu'n toj kywutz jun xmilb'il de Qajwa toj kya'j. Tu'mpitziantzjo b'ex jaw kyb'inchen jun tja te jun majx ja oka jyeta; tumpitzintzjo nxi nimet qapa antza tzajnitxi tb'i tnam te Txolja.

Ex tzuntzi nkub' yolit, te otaq i-opn kyxhtyan, attaq kab'a tnam tuk'a tb'i Comitan. ÒJun ja tkyijsini te nim tnam te Ciudad Real, toj junxil yol a jalan Comitan te México, ex atzin juntl tzajnix te aj ojtxi tja Dios Santiago de Texutla, a jalen ojtzq'in kyu'n xjal te tnam Ajquqel, antzina tzanjnitza tb'i tnam te Txolja tij nim tnam te MéxicoÓ tb'ajnixitzin jniqe ab'eqe cheb'a ok tb'i te Tyuxh tnam te Txolja, tzenkuxixjo tb'i jalen.

Toj junxil tqmab'etz tu'n Favian Rosales (ab'q'e 1,989) toj junxil txilnen ntzaj tq'ma'n tib'aj tzajnixix tb'i Txolja, antza ela tib'aj tb'i ti'j tnam te Twi' Quqel tetzin tb'aj ab'qa b'exsin ok tb'i te Txolja tzenkuxjo tzib'inkux tu'n xluqil Lib'ingston tzenkux q'uq'b'il u'j kyij qe toj ab'q'a 27 te agost te toj ab'qa 1,983 a quij tq'on toj tkawb'il tnam tzenkux kux tz'ib'et toj tkawb'el B'arrios, ikytzin tq'ma'n kawb'el twutz tnam te Paxemel toj ab'q'a 1,925 junx kyuk'a junxil tnam.

A tzajnixix tb'i tnam te Txolja ntq'man Tob'ar (1,990) tzuntzan ntzaj tq'man kye nti'x tumel ja tzajnitza, kun tu'n nkub' q'man a tnam kyij q'on tb'i te kyu'n kyxhtyan, Txolja a toj junxil txilnen Òmu'xh tnam te TxoljaÓ kun tu'n el jyet jun tnam ch'ima ikyjo tilb'aljo tzenku nim tnam te México jun tnam ja najleqataq ex ja tzajneqetaq kyxhtyan.

Juntl ajtz'ib'el ntzaj tyolin Arriola (1,973) toj tpujb'il yol ntzaj tq'an kye a yol Txolja mu'xh yol te tnam te nimTxojla te México. Tzenkux tun B'ecerra tzuntzin tq'man tze'n toka tzajnix ti'j tmuj Komik toj junxil txilnen kyaq tb'i exsin tlan toj jotxsin txilnen ja Ònlob'jena kyaqÓ, ex tzuntzin nq'met tzajnix tb'i tib'aj b'inchel k'wil mo ja nchi b'anta txikyb'il wab'j. Es ikyxjo tmuj Cimitl, k'wil; me ojx tnab'l ajtz'ib'il, Òntix ttzajnetz, ex nt'i txkyijsin makb'il, qa tojo nim tnam te Méxiko ibÅfaj b'inchine makb'ilte txikyb'il.

TXOLJA TOJ YOL MAM

A tnam te Txolja, chikyb'enkutzin toj yol Mam atzin tb'i kyjalo: Txolja, axjo yol o tzel pjet txilnen tib'aj txilnenxix, me tzuntzin ntzaj jyet txilnenxix toj ojtxe yol ex axixsin tq'mab'etzjo kyu'n xjal Mam te ja'len ÒTXOLJAÓ.

ÅgTxoljaÓ, toj txilnenxix twi' yol, tzenkux o kub' chi'ky'b'itxix tzuntzen el pjet toj tumel kyjalo: ÒTxoljaÓ. T-xol xikyla tij jun txu yol a txilnen txol, toj mo txol ja. Tumpitzintzjo txilnenxix wen toj tyol kyxhtyan, ja txolinku, ja nik'unku, txolila ja mo txol ja.

Tzuntzin nq'umb'latz atxix ojtxa, ex tzunx nq'umb'lajtz ja'len kyu'n xjal, tzenku jun xjal aj txi' toj tnam te Txolja, tzuntzin nkub' tyolin kyjalun. ¿ja ma txiyiy? (ttzalq'b'il), ma chi'n Txolja,

Ex tzuntzin nkub' yolin tib'ajala atxix ojtxix wen kyu'n ajq'ij tzenku nch'ex toj tnam te Txolja jun tkub'il toj tniky'b'il ja tu'n txi' nayeta tb'i Qajwa tokx toj Kya'j, tojtzin tkyajil tumel te txe tx'otx'; ex apitzin tiqb'il tnab'l tnam xjal Mamjo ex tepitzin tok ka'yet kypob'in txqan tnam xjal Mam twi' wutz, b'exsin ok kytzyu'n kyxhtyan tu'n tjaw b'inchet jun tja Dios Katolik japitzin tu'n kytzyeta xjal ex tu'n tok nojsit toj kywi' xjal Mam tzenkux kynimil kyxhtyan. Me ikyxjo aye kyxhtyan b'ex i-ok kyq'on Pala ex Mala tu'n kyaqnen tib'aj tb'i Dios ex tu'n kyjaw nimen qxjalil toj kynimil.

¿Tiq'un nkub' q'met qa twi' Txolja na'j kynimil tnam Mam?

Qu'n tu'n jawnin taya Tz'unin Wutz a jalen kojb'el te San Isigr tb'i qu'n jalen, ex atzin elnen atzin taya Kyaq ja, a ojtzqin qu'n jalen kojb'el Chq'ajlaj, a oknen taya Twi' Saq Ja, a jalon ojtzin kojb'il te Twi' Saq Ja ex kub'l antza taya twi' Tzma, a jalen ojtzqin tuk'a kojb'il te Tzma mo toj tqan Ch'ech'. Tuntziantzjo Txolja tojxix tniky'jil taya kyxol twi' wutz ja nxi nayata tb'i Qajwa kyu'n Qcham Mam tumpintzintzjo te kye: Txol ja mo toj tky'ajan taya te kye nim ja nab'l Qajwa.

JUNXIL TXILNEN TIB'AJ TXOLJA.

Toj junxil yol kyu'n xjal kye a Txolja tzun iky' txlajala nim a', ex tumpitzintzjo kyu'n xjal Mam nkub' kyq'man qa Txol a' taya, txol a' mo txol nim a', me ikytzintzjo a tnam te Txolja tib'aj jun tb'anel wutz taya ex atzin txeyela tnam tzuntzin iky' jun nim a' te Tx'ixel, a tzajnetx tib'aj twi' wutz a oknen taya te tnam exsen n-ok -kymujb'en kyib' tuk'a nim a' ntzaj txe ta'l mich a ojtzqin nim a' te Democracia.

Atzin a' lo n-ok tmujb'en tib' tuk'a junxil nim a' a tzajnix ti'j Esquipulas Ajquqel exsin n-ok kymujb'en kyib' txe kojb'el tx'otx' Twi' Saq ja ex kojb'el tx'otx' Tx'ixel exsin n-iky'ela txe tnam te Txolja, ex atzin kumnen ja nkub'a q'ij te tnam n-iky' juntl xhqiyen a' txe tzma apitzin nim token kyu'n xjal te txjol b'u'xh, te a'yil itzaj ex txqantl. Atzin a' lo, n-ok tmujb'en tib' tuk'a nima a' te Tx'ixal exsin jun n-ok kymujb'en kyib' tuk'a nim a' te Kilko Huehetenango kyuk'a txqantl a'. Te oknen te tnam tzuntzan ntzaj a'nqen juntl xhqiyen a' exsin n-ok tmujb'en tib' janen tuk'a nim a'te Tx'ixel.

Qapa noq tu'n lu'n oka tb'i te tam te ÒTxol a'Ó a Txolja.

Me atzin jalen TXOLJA tb'i kyu'n jotx tnam. Kyu'n xjal te toj tnam Txolja ex tzenku kyu'n xjal te kojb'el te tnam.

TWUTZ NIMIL EX NAB'L QAJWA KYU'N XJAL MAM TE TNAM TE TXOLJA

OJTXIX NAB'LIL

A ojtxix wen, ntitaq txqan nimal. Noqxitaq nab'l Qajwa ex tu'n tkub' nimet jnilexjo at tib'aj twutz tx'otx', jnilexjo ma tij ex tzmaxix tal mu'xh, jotxtaq xjal cheb'a nimantaq kyu'n jilexjo at taq kye, jnilexjo kye xjal nchi nijan tjaq' junx ja, tzuntzin n-ok kymujb'en kyib' aj qok yupj tu'ntzin tok najset kyil a tku'x toj q'ij, exsin b'ex n-ok kymujb'en kynab'l tu'n kyq'on chjonta te jnilexjo ntzaj toyen chwinqel ex jnilexjo toyaj Qajwa exsin tu'n tpon b'aj b'exsin nxi' ok kyxenan kyanmen te te Qman Qajwe, tu'ntzin kytan wen tu'ntzin tchmet tqan kypb'el te junxil q'ij tu'ntzin tel b'an juntb'anel aq'untl.

Atxix ojtxa wen, a junjen twi' k'ul, wutz, jul, k'ul ex a' attaq jun kyajwa a tb'i kyu'n ojtxe xjal tajwa wutz. Aye ajq'ij nimxtaq kynimil te'yala junjen talen wutz ex toj tb'anel ex tb'anelxix te jun paten ex tkub'el tu'n txi qanet tu'n txi ky'iwlet noq alkye jun xjelb'etz.

Ilxix ti'j tu'n txi nayet kye jotx xjal attaq jun kymuj a tkab'en tuk'a xjal te tij xjal ex te jun ajq'ij, noq tuntzin lo nimxta tipel tu'n tb'an jnilexjo tb'anel tu'n tb'ant. Atzin tajwa xjal mo tuk'a xjal jun oyaj atxitx tzen aj tanq'en. Ajtzin tanq'en jun tal k'wal b'exsin k'wel ky'iwlet tzenkux taj tmuj mo tajwa, mo b'exsin kokel echsit tuk'a tuk'a mo tmuj tjawa tzenkux taya amb'il mo techb'in tuk'a tmuj tyuxh ti'j tplaj mo twutz tk'u'j exsin kxel qanet te Qman Qajwa titaq kyaj Mamb'aj tu'n toka te jun chi'j.

Atzin nib'al Qajwa, atzin tq'uqb'ilte kywutz kynab'l qyajel. Ja nim toka ichin ex qya twutz tx'otx'; ex jnilexjo tx'uk ex alumj najletaq kyuk'a ex kytxajela. Tojtzin kynimiltaq txenkuxjo nkub' yolin kyu'nojtxa xjal ex qchman, jotxsin nkub' kynimen ex nkub' kyk'ulen twutz qman Qajwa: a B'inchelqe ex Qawelqe mo tanmen kya'j ex tanmen tx'otx'.

Te te tnam qyajil Mam te Txolja, a twutz nimil nimxtaq toklen, qun tu'n atxixtzin tq'ujel qchwinqel ex tniky'b'il chwinqeljo, me atxixsin tb'anel nimeljo te jotx jnilexjo nb'ant kyu'n te junjenle q'ij; nti'j jun q'ij ja n-ele naja ja tu'n txi qaneta jun xjelb'el te twutz tx'otx' tu'ntzin txi xkye noq alkye aq'untl exsin nkub' kyb'inchen tuk'a jun xjel exsin nkub' patet pon ex atzin aq'untl nimxixtaq kyk'uj ti'j ex nimxix kyk'ulb'il ti'j, esxin jun xjel tuk'a jotx jni' kyanmen te qman Qajwa ex k-xel qanetxis kye txew tajwa wutz a nimxtaq tonmel mo tipel tib'ajo kxel qanet.

Atzin jni' k'ulb'il tzuntaqtzin nkub' b'inchet tu'n tel pjet tib'aj tajwa il ex tuntzin tklet te jnilexjo tu'n tkub' b'inchet exsin tu'n ntix chi b'ajte ti jnilexjo kb'antel kyu'n, me nojneqexixsin tuk'a txqan ky'iwlen; tuntzin tb'et kyaq'en ex te kyawal, kyk'ayb'el, tu'n mi tzajex yab'il kyij, ex tuntzin kyklet jnilexjo kyb'aj ex txqantl.

Tzuntzin noken awal te tb'anel yek'b'il ex twutz kjo'n a axix tnejel awiljo kye jotx jnilexjo xjal. Aye ojtxe qyajel tzuntzin njaw kysk'on a tb'anel jal te te jun tb'anel kjo'n ex atzin tzenku nku'x awet tzuntzin n-oken kab'a tb'anel jal te tjaq' kyqul te yek'b'il te jun tb'anel twutz kjo'n me tzuntzin nkub' pa'yet a toklen tten jal a nimxixtaq toklen wen.

Tzenkuxjo nkub' yolet ku'n xjal, atkutzin nq'umb'let kye a ixi'n sjanennim toklen, kyoklen xjal kyxhtyan, a ixi'n q'an toklen xjal kyxhtyan itz'jlen tzalun, a ixin kyaq toklen kye xjal itz'jenqa toj tmux tx'otx' ex atzin xpenen ixi'n toklen kye xjal q'aq aye i ul texa tb'aj i-ul kanen kyxhtyan.

Aye tij xjalqexix wen nimxitaq kyxim ex kynab'l ti'j toklen junjen xjaw ex nxi' kyniky'in tokeln junjen toklen amb'il, tzenkuxixsin toklen amb'il ex toklen xjaw, a nimxitaq toklen te kynimel ex tb'anel kyxim xjal, jnilexjo lo, ikyx toklen tzenkux taya kynab'l ojtxe xjal Mam, junxtaq taya kynimil ti'j Qman Tata tokx toj kya'j, a axix nejeneljo te jotx toj chwinqel. Te tnam xjal Mam, a Qman tokx toj kya'j tzuntzin n-ok kayet tib'aj jnilexjo at tib'aj twutz Tx'otx'tzenkux twutz q'ij, twutz xjaw, twutz jb'al, twutz kyq'iq' ex txqantl. Tumpitzin n-ok kyk'ulen wen exsin nxi' kyq'on chjona te junjen toklen twutz amb'il, ilxix ti'j n-ok kyq'on jun twutzb'il mo tk'oj twutz amb'il tzenkux taya toklen twutz q'ij. Jotx jnilexjo nab'l Tata qajwa tzuntzin nxi' k'ulet tib'aj jun wutz a nimxix txiya exsin nim toklen tb'i te nab'l Qajwa nim toka kye xjal Mam, jotxqix Ajq'ij kyojtzqin wen tzenxix nxi' kyk'ulen tb'i Qmman Tata tokx toj kya'j, nimxix kyqanmetz ex nimxix ky-yol tuk'a qma Tata tokx toj kya'j, Atxix ojtxix tzuntzin ntzaj yolin ex nkub' yolet kye tzuntaq n-okxet txikyb'el tb'anel wen ex nixixtaq twi' tzenkuqexixjo: tb'anel tjaq' qulb'aj mo u'j te tjaq qulb'aj q'an pwaq, xmil q'ob'aj cheb'axix b'inchinku, toj xhkyimaj, txikyb'il k'wil a cheb'akuxix b'inchinku ex uk'sinku tuk'a q'an pwaq ex saq pwaq ex cheb'aku uk'senku, ab'j tb'anel, ab'j cheb'aku b'inchenku ex txqantl jotxsin jnilexjo xqlonte tzuntaqtzin n-oken te nab'l Tata tokx toj kyaj kyu'n ojtxa xjal Mam.

Me ikyxpitzintzjo, tzmayankux el jyet toj jun jul tb'anil k'wil junxtaq ta'ya kyuk'a jni' tb'aqil ojtxix xjal, tojtzin t-tx'otx' tata Alejando Pérez el jyeta a tkyjnen toj kojb'el te Chqajlaj te tanm te Txolja.

Jnilixjo txikyb'il n-ajb'en te kyaqnen ojtxex xjal te na'b'l Qman Tata, tzuntzin n-oken patel pon, tzib'el inciens, aconjolín, kandel te kyaja uk'sel qu'n tu'n niminku a tkyajen tonel twutz tx'otx' kyu'n ex tokx toj kynab'l a toklen tyuxb'il Ajq'ij, atzin sjanen kandel n-ok q'on ja ntzajnetxa twutz kyq'iq', atzin kandel q'an tzuntzin n-ok q'on jan n-kub'a q'ij ex ja n-exa kyq'iq' ex kye xq'uqel twutz tx'otx' a ntzaj q'onte tchwinqel twutz tx'otx', atzin kandel kyaq nkub' qon te elen te tx'otx' ja njatza anq'ene twutz q'ij ex atzin q'aq kandel n-ok q'on tzenko n-ok qniky'in ja k-ajlalela xjal tu'n tajlana ex ja tu'n telnaja sikytlin kyi'j.

Ja nxi' b'inchita nab' qman Tata tokx toj kya'j, tzuntzin n-oken chi ptz'an, miel, kandel te nimx kayen, b'ech te nimx ka'yen, chokolat, q'en, insiens, rmer, a', pan, q'anmel k'ul a nimx ntq'anen me nlayx tzel najx twutz mich a te kye k'ulen twutzxix, exla atla junjentl Ajq'ij atl junxil tumel tzen tu'n tnana tb'i Tata tokx toj kya'j, me noq tzenx tyolb'il tuk'a qman ex noq tzenx t-xjelb'etz. Nti'x jun q'ij ja n-el naja toj kyk'uj te xew xjan q'ij ex kye qchman, kye twi' wutz ex txqantl.

A kynimel tanm xjal Mam, me nimxixtq tximetz ex nimkutaq tu'n tkub' nimet kyu'n qya ex kyu'n ichin kun tu'n jun tb'anel kawel kye kyk'wal, kun tu'n te kyaqil nchi q'ona chjonta te qman Tata tokx toj kya'j. Tzenku a qel sqix , tzenku a tok xkye jun aq'untl, a tok xkye jun kyk'ayb'il, aj kyok kyawal, aj tjaw kyiky'sin jun tze ex txqantl. Juntl tb'anel nb'an kyu'n a tzen aj kyex toj jun kyb'e naqchaq tzuntzin nq'umb'latz kye at jun echb'il q'onkj ku'n ojtxa xjal twutz xaq at jun twuxh tze ttxan jun tnam me tib'ajxix juntwi wutz taya ja n-oka chujeta twutz q'amb'aj tuk'a weky mo k'ul q'anmel yab'il tzuntzin nkub' b'inchetjo lun tu'n mina chi sikyte toj jun naqchaq b'e exsin n-xi' kyqanen te tajwa wutz tu'n kych'iy toj kychwinqel ex twutz kqan twutz jun tnam, jox cheb'aku nimenku kyu'n twutz tx'otx' kyu'n.

Jun tqanel te xb'aj tz'ib'et, kye xjal Mam nimxixtaq kynimil ex nimxixtaq ipel kynab'l ja tu'n tkub' ky'iwleta jni' at twutz tx'otx', me nimxixtaq chi nimen ti'j toklen xjaw titz'jlen te teyele junjen xjal ex tzenkux kynim ti'j toklen xjaw.

TWUTZ NIMB'EL TE JA'LEN

A kynimel xjal te tnam Mam ja'len te chq'alxix taya tuk'a jnilexjo at kye. Attzin kypel toj tb'anel nimel tzuntzin ntzaj tq'man tzenkux kyten toj kyja ex tzemkux toj kynab'l. Exsin n-ok ttemin tib' te jujnx chwinqel te teyele junjen xjal ex nimxix toklen tuk'a jnilexjo xjal at toj junjen ja ex toj kojb'el tx'otx'.

At junxil tipil kynimil xjal te tnam te Txolja a q'ol chjonta. Aye xjal nchi q'onte chjonta ti'j jni' b'yen ntzaj b'inchen kyi'j, nchi q'on chjonta aj tjaw q'ij, aj qok toj qale aj tok qniky'in, a tze'n ky'iwlenqe tib'aj jni' kyawal, kyk'ayb'il, ex nchi q'on chjonta tib'aj jni kawb'el nkytzuy, a jni' kyq'olb'en, akyten toj jni' kychmob'il kyib' tuk'ax jnilexjo xjal at toklen kye ex tok kojb'el ja nchi nejana ex txqantl.

A kytzaljb'al xjal kyolilax jnilexjo at toj ja ex jnilexjo at toj kojb'el b'exsin ntzaj yeky'in toj tnexhil mo aj ttzaj toj tk'walil, me aj tiwlel qa ma b'ant tyolit yol Mam tu'n k'wal. Atzin yek'b'il tzuntzin ntzaj onet aj tqnen tib'aj ypl toj tch'iyel kyxolila xjal ex onb'et mo mojb'elt kyxolilex.

Junxil tumel tze'n taya tchwinqal jniqe xjal a tzen tu'ntkub'a nimata tij xjal tu'n qun ayexixsin tij xja nimenqe kyu'n xjal ex k'wal, tzenku ta'xa, Mamb'aj ex aya xjal nim kyoklen twutz tnam, qu'n axixsin nimenku kyun xjal te tchwinqlel twutz tnam. Atzin ninmel atzin jun oyajljo te tnab'l ex txim kye xjal, ayintzin tij xjal cheb'akutzin chi k'wel nimet qun tu'n nim kynab'l ex ayitzin ochi aq'nen tze toka tumel.

NAB'L OJTXIX TOKLEN PWAQ

Tzenkux nb'aj junjen ab'qa ikyx ntxixpeta twutz pwaqjo, a twutz xb'alen, tzen toklen chwinqel, twutz aq'untl, tb'inchel twutz ja ex txixpel twutz yol. A junjen tx'ixpel tzajxkyeya noq tu'n xamyenqa xjal kyu'n kyxhtyan ex kyu'n xol q'aq' smantz kyu'n ajkawel tnam ex kyu' jnijo nimel kyij q'on kyu'n kyxhtyan.

Toklen pwaq atxix ojtxex, tzuntzin nq'umb'letz kye nti'xixtaq pwaq, qa kyajtaq xjal jun titaq atku noq njaw kytx'ixpentaq noq ti' kye extaq tzuntaq n-okentaq pwaq real. Ex tzuntzin nkub' yolen kye a pwaq atzin tzuntzin nkub' payet te kab'a, noq tu'n atzin noq jnix aku kub' qe jun twutz k'axhjel kyu'n, noq jun yek'b'il tzenkuqa xajl nche'x k'ayel toj mb'laj k'ayil kyk'axhjel tzenku tal k'wil mo laq te txikyb'el. Tzuntzin nche'x k'ayel toela b'e tzmaxi aj kypon kanen toj mb'laj ex ajtzin kymeltzaj tzuntzin ntzaj kyqen kylo' a'y, xkoyb'et, txe txan, atz'in ex xqantl. Tuntzin tktxet jnilexjo nb'aj toj ja.

B'INCHB'IL K'WIL

Kyxol jnilexjo b'inchel txikyb'il a b'inchinku kyu'n jniqe xjal toj tnam ex toj kojb'el atzin b'inchil k'wil, ayintzinqy'a nkypetb'in kyib' te b'inchilte jnilexjo nkub' b'inchet te txikyb'el: k'wil, xk'on, xar ex xhoq' exsin ikytzin xi b'inchite kyjalun.

Atzin ja njatza leketa twutz tx'otx' a tb'anilxix wen te b'inchb'il jniqe k'wil, ex kujxix wen te b'inchib'il txikyb'el.

TZENXIX TB'INCHB'AJTZ TXIKYB'IL K'WIL.

Tuk'a jun ka patz'le, a ch'ime ikyxe tzenku jun ka te cheb'l b'utx, nkub' cheyet tx'otx' kyaq ex sjanen, exsin b'e'xsin kxe'l smet tu'ntzin tkub' kujexix. A saq tx'otx' tzuntzin noken tu'n mi tzel paxa, ex tumpitzintzjo atko at xar sajnen ka'yen ex kyaq kÅfayen.

Atzin xoq'l ok kxe'l b'inchet ex k'wel yoq'et exsin cheb'aku kxe'l a' toj exsin kxel smet tuk'a tx'otx'exsin cheb'aku kelel mayet a tx'otx' nya' wen, ajtzin tb'aj smet oktzin ktzajel tzyet ch'in xoq'l tzenkux tqanmetz jun tal k'wil mo a k'wel b'inchetexsin cheb'aku kjawel joyet toj tuk'a jun tal kxb'il selew tten tuntzin tkub' tq'esemel twutz xoq'l tzenkux taya jun tq'esemel jun k'wil, exsin cheb'aku kxel xhqiyb'et twutz tuk'a jun tal b'uxh ak' wen tu'ntzin telb'anxix wen tojxa ex tijxa exsin kyjel jun jteb'en q'ij tu'n tkub' tzqiset tjaq jun tal pach mo tjaq q'ij, tunzin mina tz'el paxa ex tb'anel toj telemex a xb'aj b'inchet atzin tal txikyb'el ok kxel q'uqb'et tib'aj jun tq'uqel k'wil b'inchinku tuk'a ch'in ch'um exsin cheb'aku kxel b'antzit, jotxsin jni k'wil b'exsin kxel patet tuk'a txqan txaq tzaj mu tuk'a ch'um tzqij wen tzen aj tjapen b'aj q'ij te sap'l tuntzin tkub' k'ayet toj plas toj tnam te Txolja ex tzenku kyoj k'ayb'el te junxel tnam.

TB'INCHB'AJTZ B'U'XH

Atxix ojtxix tzenkuxjo nkub' kyq'man ojtxex xjal kye ayix xjal nkub' kyb'inchen kyb'uxh mo kyxb'alen, kye qya, ichin ex k'wal.

MAKB'EL TE XB'ALEN

Aye xjal te tnam Mam tzuntzin nkub' kyb'inchen kymakb'el te b'inchel xb'alen, junjentl nxi' kysm'an tu'n tkub' b'inchet kymakb'el xb'alen tuk'a jun tb'anel b'inchel twutz tze, ex jnjentl nche'x jyolte toj junxel tnam.

Atzin makb'el te b'inchel xb'alen, makb'el b'isinku te b'incheltete twutz xb'alen te kyex xjal te tnam te Txolja, exsin nkub' aqnet kyu'n xjal ichin a nim kynab' tzenxix tu'n txi b'inchb'et xb'alen, a nimxex toklen tzen tu'n toka toj makb'el ex tzenxix txiya jni' q'in.

Atxin makb'el lo aq'nekutzin kyu'n ichin exsin tajxix tu'n tokena kyq'ob' xjal tu'n tb'ant, kyqan exsin tb'anel kwi' xjal tu'n tkub' b'iset tzenxix tu'n tkyij wena twutz xb'alen exsin tzenxix tu'n tkyij wena tu'n mina tz'ela tk'wa' ex tu'n mina tzela b'aja lwey aj tokset kyu'n xjal, atzin makb'el xb'alen xhqina taya te kyaja toj qob'aj txhqinaku ex kab'a toj q'ob'aj toj tk'atz ex kab'a toj q'ob'aj toj twalil.

KYCHEMJ QYA

Aqe qya ex ikyxjo tzuntzin nchi ipen kyib' tu'n kub' b'aj jun kyaqen te chmob'il twutz pasj, apitzin n-oken kyu'n qya te kypasx ex noken te kyk'atz atzin kyaqen nimxix tuk'sel ex nimx pich' tojela; jun ponex kyb'is ex jun tb'anel kyaqen ajchmol. Me nya'oÅfkx paxj nkub' kyb'inchen, tzuntzin nb'an pana kyu'n, b'uxh te kutxb'el mexh, txowaj, si'pj te wi'b'aj ex txqantl.

Atzin makb'el b'inchel xb'alen noken kyu'n b'incixsin ttnen tuk'a jun b'inchel twutz tze, qapa b'inchinko kyu'n kyxolilax. Ex atzin twutz q'in tzuntzin ntzaj laq'on toj k'yb'il me toj junxil tumel ayix b'inhelte twutz q'in tuk'a twutz noq'.

TWUTZ TTX'OTX'IL TANM TE TXOLJA,TELNEN TE TOJ CH'UM TNAM EX TE TOJ TXU NIM TNAM TE PAXIMEL, TE TOJ TKY'AJEN TX'OTX'

A tnam te Txolja tok tib' te b'eljaj winqen tnam te tq'ob' nim tnam te toj Ch'umex okne taya te txu tnam te Paximil. Exsin tokx tib'a tb'anel txu wutz de ex toj tkyajen tumel elnen te tq'ob' nim tnam te toj Ch'um tanam.

A tnam te Txolja kumne taya te nim a' te Tx'ixal ex toj tniky'jen oknen de nim a' te kojb'el te txe Tzma, ex twalil te tib'aj ttxu a' te 2,280 Msnm.

A tnam te Txoplja oktzin knete t qu'n kyaj laj winqen de tq'ob' tanm te toj Ch'um. Atzin tb'eyila otzin txi b'inchen tuk'a xkab' a'b' tzajnetx te tnam te toj Ch'um ex npon b'aj toj tnam te San Lorens, ex te San Lorens tu'n tpon kanen toj tnam te Tx'olja, ex nim b'e ja nti'ya xkab' a'b'j toj. A tnam te Txolja oktzin kyjetel qun te 283 kylomtr te txu tnam te Paximil, ja tzuntzin n-oksete nim b'a ja b'inchinku tuk'a xkab' a'b'j exsin ch'inetz' a mina b'inchen tuk'a xkab' ab'j.

A ja te xnaqtzb'il de Paximil tzuntzin ntzaj tq'man jun tumel a nimxixch'il ex jun xnaq'tzb'il tz'ib'enku toj ab'qa te 1,964 exsin ntq'man: Òa twutz techb'il twutz tx'otx' tnam te Txolja tzuntzin npon kane te 113 kyilomtr. Swejlen tten. Toklentzin te 225 chejb'el, 35 mansan ex 36 echb'el. Kab'a toxen toke ja awanekuxa jniqe twutz tze, junjen chqajb'el ta'ya ex ja nimxix twutz kuj tx'otx'mo pk'at tx'otx', kyaq tx'otx', twutz tx'otx'otx' ja n-iky'a twutz nim a, tnam ex junjentl tnam ja nimxix nijalte, ex juntoxen ttnen tx'otx' ja wen te awalb'ajÓ. Tumpitzintzjo a tnam te Txolja 113 kyilometr twutz ttx'otx'il ex swejlinku tten, toj junxil txilne te oxe pich toklen te tq''b' tnam te toj Ch'um, a tq'ob' tnam te toj Ch'um 3,791 Kyilometr swejlen tten.

TXANNILA TWUTZ TX'OTX'IL TANM

Tnam te Txoja ikytzin toke ttxanela tx'otx'iljo kyjalo: a tumel jawne antza taya tulk'a tnam te San Miquel ex tnam te Sipakapa, a kumne te tnam npon kanen ttxan tuk'a tnam te San Lorenzo ex tq'ob' nim tnam te toj Ch'um; ex atzin elnen npon kanen ttxan tuk'a tnam te Kab'rikan te nim tan te Txelja, ex oknen npon kanen tuka tnam te Twiquqel ex tuk'a tnam te tq'ob' nim tanam te toj Ch'um.

A twutz tnam te Txolja, b'an tu'n tok qyayen tuk'a jun tb'anel tnam a tnam te Txolja tzuntzin tajlan tuk'a qaq lajaj kojb'el, b'eljaj winqen tq'ob' kojb'el ex kab'e mu'xh kojb'el, tzenkux qmab'etz q'ontz tu'n tja kawel de tnam te Txolja, jotxsin jnilexjo kojb'el at jun kyaq'en ja sk'onsqe tu'n tnam ja chi okela te ausiliar, jun ch'uq xjal ja tu'n kymojena te ch'isb'el jun tb'anel toj kojb'el, toj jnilexjo jokb'el at jun ja jaa nchi chmeta ausiliar, ja te nab'l Dios Katolik ex junjen ja te Dios eb'angelik. Oktzin k'wel txolb'in jun ch'uq kojb'el tx'otx' te tnam te Txolja.

KOJB'EL TE TNAM TXOLJA

1, Tz'unin Wutz, 2.San Luis, 3. Twi' muj, 4. Twi' Xoq'l, 5. Tx'ixal, 6. T-txan Tx'ipel, 7. Chq'ajlaj, 8. Txel ta'l Mich, 9. Twi' xu'len, 10. Twi' Q'aq a'b'j, 11. Santa Teresa, 12. Twi' Chlub', 13. Sap'al Ich, 14. Twi' Tzyamaq, 15. Ch'ix tul, Candelaria, 16. Nim Txe a'.

TQ'OB' KOJB'EL TE TNAM TXOLJA

1, Tb'anil Tx'otx', 2. Twi' saq tx'otx', 3. Txan kojb'el tx'otx', 4. Sap'al Ich. 5. Winqen pwaq, 6. Tb'anil k'ayb'il, 7. Tyuxh b'e, 8. Tb'anil kayb'il, 9. Twi' xb'uqeb', 10. Twi' Jala, 11. Txe xaq, 12. Twi' saq ja, 13. Tb'anel kojb'el, 14. Q'etxle muj, 15. B'ajne cheb'l, 16. La lib'ertad, 17. Txol b'ujle, 18. Twi' wutz, 19. Txe tzma, Toj ch'ech, 20. Las cruces, 21. Toj tqan b'ech, 22. Xhmoq', 23. Tb'anil kojb'el, 24. Txe kyaq, 25. San Francisco, 26. Toj txasen, 27. Lob'l atz'in, 28. Twi' Kyaq, 29. Twutz ChÅflaj.

MU'XH TQOB' KOJB'EL TE TANM TXOLJA

1. Sq'unen a' mo maqmaj a'. 2. San Pab'lo.

TXILNEN KYB'I KOJB'EL TE TNAM TE TXOLJA

TB'I TOJ TYOL TB'I TOJ YOL MAM TXILNEN KYXHTYAN. TOKLEN.

1. Comitancillo................Txolja.............................Txol ja mo txol a'

2. San Isidro.....................Tz'unin wutz..................wutz te yuxhb'il

3. San Luis........................San Luis.........................Tb'i kyu'n kyxhtyan..

4. Chipel...........................T.txan Tx'ipel................Axix tb'anil.

5. Taltimiche.....................Txe ta´l mich..................Toj tqan mich.

6. Santa Teresa..................Santa Teresa...................Tb'i kyun kyxhtyan.

7. Los b'ujes.......................Txol B'ujle.....................Txol wutz.

8. Twixoquel.....................Twi' Xoq'l.....................Xoql Tx'otx'.

9. Porvenir Candelaria......Ch'x tul..........................Kojb'il Ch'ix tul.

10. Rio Hondo.....................Nim txe a'......................Nim txe a'.

11. Paraiso...........................Tb'anil Tx'otx'.............Tb'anil Tx'otx'.

12. Tuiscajchis o tierra B'lanca...........................Twi' saq Tx'otx.............Twi' saq tx'otx'.

13. San José la Frontera......Txan kojb'el Tx'otx'......Txan kojb'el Tx'otx'.

14. El Salitre........................Txe Atz'in......................T-tx'otx'il Atz'in.

15. Veinte Reales.................Winqen pwaq.................Tb'i winqen pwaq.

16. B'uena Vista B'achuc.......Tb'anil kayb'il...............Tb'anil kayb'il.

17. 4 Caminos o Cantón de Cristo..Tyuxh b'e............Npon kane kyaje b'e.

18. Chiquilá B'uena Vista.....Tb'anel kayb'il...............Tb'anel Ka'b'il.

19. Tuijala.............................Twi' Jalb'en..................Tzaqpinj ja.

20. Las Vegas........................Txe xaq.........................Txe xaq.

21. Los Angeles....................Tb'anel kojb'el..............Tb'anel tx'otx' kojb'el.

22. Molino Viejo...................B'ajnen Cheb'l..............B'ajnen Cheb'l.

23. La Lib'ertad......................Lib'ertad.........................Tb'i kyu'n kyxhtyan..

24. La Cumb're.......................Twi' Wutz....................Twi' Wutz.

25. El Jicaro Tojcheche.........Txe tzma, Toj Ch'ech... Toj Ch'ech, Txe Tzma.

26. Las Cruces.........................Tk'ulb'en kyaje B'e...Tk'ulb'en kyaje b'e.

27. Las Flores..........................Toj tqan B'ech............T-tx'otx'il tqan b'ech.

28. Ixmoco...............................Xmoq'........................Tx'otx' toj julele.

29. La Primavera.....................Tb'anil kojb'il.............Tb'anil kojb'il

30. San Francisco....................San Francisco..............B'ib'aj q'onkj kyu'n kyxhtyan.

31. El Durazna.........................Toj txasen....................T-tx'otx'il Trasen.

32. Tuiquiac, los Cimientos.....Twi' kyaq....................T-tx'otx'il toj kyaq.

33. Tuimuj................................Twi' Muj.....................Tx'otx' ja nkub'a muj.

34. Chicajalaj............................Chq'ajlaj......................Toj chq'ajlaj.

35. Chixal..................................Tx'ixil.........................Tx'otx' te Tx'ix.

36. Tuilelén...............................Twi' Xu'len.................kynajb'el Xu'len.

37. Twichilupe..........................Twi' Chlub'.................T-txotx'il tze chlub'.

38. Sab'alique............................Sap'l Ich.......................Kojb'eb'el te sa'b'l ich.

39. Chamaque...........................Twi' tzyamaq...............T-tziyila a'.

40. Tuizacajá..............................Twi' Saq ja..................Tib'aj mo twi' saq ja.

41. Canoa de Sal.........................L'ob'l Atz'in...............Tkub'il Atz'in.

42. Xequiac.................................Txe kyaq......................Kojb'el kyaq.

43. Quexlemuj.............................Q'etxle muj..................Wutz ja nxi kyxheya muj.

44. Cerro los B'uje........................Twi' xb'uqeb'..............ja nqox ajlana.

45. Piedra de Fuego.....................Twi' q'aq' a'b'j............A'b'j tb'anel ti'j q'aq'.

46. Los cimientos.........................Twutz ch'laj.................Twutz Ch'laj.

47. Agua Tivia.............................Sq'unen a'.....................Squnen a'.

48. San Pab'lo................................San Pab'l......................Tb'i kyu' kyxhtyan.

T-KYIJLEN TECHB'IL TB'EYIL JUNJEN KOJB'EL TE TNAM TXOLJA

TECHB'IL B'E

1. Txojla tex toj tnam te Txolja..........................nti'x techb'il

2. Txolja tzmax San nisigr...................................jun laja

3. Txolja tzmax San Luis.....................................B'eljaj lajal tuk'a niky'jen.

4. Txolja tzmax Txan Tx'ipel..............................Wuq

5. Txolja tzmax Txe Ta'l Mich............................jwe'

6. Txolja tzmax Santa Teresa...............................wajxaq.

7. Txolja tzmax Txol B'ujle..................................kab'a.

8. Txolja tzmaxTwi' Xoq'l..................................jun lajaj.

9. Txolja tzmax porvenir Candelaria...................Kab' lajaj.

10. Txolja tzmax Nim Txe a' mo nejab' txe a'.....jwe' winqen.

11. Txolja tzmax Tb'anil Txotx'...........................kab' lajaj.

12. Txolja tzmax Twi' Saq tx'otx'.......................kab' lajaj.

13. Txolja tzmax San josé la Frontera...................ox winqen tuk'a niky'jen.

14. Txolja tzmax Txe atz'in...................................B'a'ljaj laja.

15. Txolja tzmax Veinte Reales.............................B'eljaj lajaj tuk'a niky'jen.

16. Txolja tzmax Tb'anil kayb'il............................kab' winqen.

17. Txolja tzmax Cantón de Cristo.........................B'eljaj lajaj.

18. Txolja tzmax Tx'otx' tb'anel te kayb'etz........qaq

19. Txolja tzmax Twi' ja'lb'en..............................wuq.

20. Txolja tzmax txe xaq........................................wuq.

21. Txolja tzmax los Angeles.................................kab' lajaj.

22. Txolja tzmax B'ajnen Cheb'l...........................wuq.

23. Txolja tzmax la Lib'ertad...................................kab' lajaj.

24. Txolja tzmax Twi' Wutz...................................B'eljaj.

25. Txolja tzmax Txe tzma mo toj ch'ech...............qaq.

26. Txolja tzmax las Cruces.....................................jun lajaj.

27. Txolja tzmax toj tqan B'ech...............................kab'a.

28. Txolja tzmax xhmoq...........................................oxa tuk'a niky'jen.

29. Txolja tzmax la Primavera..................................oxe tuk'a niky'jen.

30. Txolja tzmax San Francisco................................lajaj.

31. Txolja tzmax toj Trasen.......................................Wajxaq.

32. Txolja tzmax Txe kyaq.........................................Oxlajaj.

33. Txolja tzmax twi' muj..........................................Wajxaq lajaj.

34. Txolja tzmax chq'ajlaj..........................................oxe tuk'a nikyjen.

35. Txolja tzmax toj Tx'ixal.......................................kyaja.

36. Txolja tzmax Twi' xu'len.....................................lajaj.

37. Txolja tzmax Twi' Chlub'....................................wajxaq.

38. Txolja tzmax Sap'l ich..........................................jun lajaj.

39. Txolja tzmax Tzyamaq.........................................b'eljaj.

40. Txolja tzmax Twi' Saq ja.....................................qaq.

41. Txolja tzmax lob'l atz'in.......................................B'eljaj.

42. Txolja tzmax txe kyaq...........................................oxlajaj.

43. Txolja tzmax Q'etxlemuj......................................wajxq.

44. Txolja tzmax Tw'i xb'uqeb'.................................jwe'.

45. Txolja tzmax Piedra de Fuego..............................lajaj.

46. Txolja tzmax Twutz ch'laj....................................kyaj lajaj.

47. Txolja tzmax Sq'ulen a'.......................................oxe

48. Txolja tzmax San Pab'l..........................................jun

KYCHWINQEL XJAL TE ATTAQ K'OJEN TOJ TX'OTX' TE PAXIMIL

a) Te atqaq q'ojen xol q'aq'.

Wenxix tu'n qyolin tib'aj kychwinqal xjal te attaq q'ojen toj tx'otx' te paximil qu'n tu'n atx' kyij cho'n ti'j kynab'l ex toj kyanmen, ku'n tu'n nlayxtaq q'uqle kyk'uj tu'n kyb'et noqx jalenx te twutz tx'otx' te Paximil, qu'n tu'n noqx ja ajq'ojexixtaq kye tuk'a nixjun aku chi yolina (Xhpin ex toj k'ul xjal) qu'n tu'n qapa chi okel i'len mo b'ex chi k'wel b'yo'n, me b'ex chi okel k'lon tu'n kyxi' xol q'aq'.

A joyb'il twutz ku'xen tu'n kyxi' xol q'aq jun xob'il kye jnilex xjal twutz tnam. Joxtzin jnilexjo ichin lijontaq tu'n kyxi' xol q'aq' noqx aj kyel tu'n kychojen, chq'axixtaq joyb'il kywutz kuxen tu'n kyxi' xol q'aq' qu'n tu'n aye tzyul kuxen xjal chq'onqetz tu'n kawel tnam te Paxemel qu'n te te kawe klolte twutz t-tx'otx'el Paxemel. Atzin petb'el lu'n kub' pa'yet te nimxix ab'aqe.

Atzin tzuyb'il twutz xajl kuxen tu'n kyxi' xol q'aq' wenxix toj kywutz q'inen tu'n tklet kyi'j ex tu'n tok klet twutz t-tz'otx'il Pximil kyu'n xjal xol q'aq' te kawel twutz tnam ex tuntxin kyb'ujen kyuk'a xinxj, mo kyuk'a xjal xol q'aq' tjaq k'ul.

Nimxin petb'el ok kyi'x xjal te i-ok tzyet tu'n kyxi' xol q'aq' qu'n tu'n nim yajb'il ok kyi'j tu'n tjet pwaq tu'n tklet twutz kyajel xjal kayel twutz tx'otx', ja t-temen ichin toj ja nimxix tajb'en tu'n toj kayet twutz kyk'wal, ex tze'n tu'n tjaw poq'en kyten, atzin jni lun kub' kypan toj oxe ab'qe mo masj ab'q'a kyij kytzaqpi'n kyja mo qapa chipon kanen noq kyimeqel a kuxen nxin q'in te xol q'aq' kyuk'a xhpint.

Atzin tzuyb'il kywutz kuxen xjal nimxix b'is tok ti'j qu'n noq tu'n ikyjo b'ex kub' tajk'en twutz kynab'l ex twutz kyten qyajel, a twutz kytemb'lin tuz tnam ex twutz tten ky-ol kuxen, noq tu'n tpaja lun ja tzaja anq'ena iky'il xjal, elqb'il tib'aj kyaqen xjal, ex lijonqexix wen ti'j kyaqen ex yasle kyten tib'aj jni' nkub' kyb'inchen. Atzin kynimel xjal xhpintj unxil ntzaj q'on toj ja te xol q'aq', a mixiljo tzenku ntxnaqtzin toj tja ex tuk'a tyajil, tnimel ex tzenkux tb'is tib'aj twutz tx'otx' ex tuk'a tnab'l tzenkux kye qyajil te ojtxex, jotxtzin jnilexjo lun b'ex jau tx'ixpen exsin ok q'on q'ojen toj kynab'l ex n-ok kyq'on kyb' te xjal nimqexix wen txenkux nkumb' kyxnaqtzin kyajil kixhtyan. Ex tib'ajxi jni lu'n a tal xjal nxi q'lon tu'n tx'i xol qaq ex chq'ontaq toka tu'n txi b'ujel tijx tyajil mo titzen a lejonqe tu'n aq'ojen xob'l q'aq', xinxj xjal mo xjal xol q'aq tjaq k'ul. Janilexjo lo a b'aj twutztzin kynab'l kyxhtyan ja jaw tzaqpeja twutz q'oj toj twutz tx'otx' te Paximel mo tutza tx'otx'il ixin Tx'otx'.

Me q'anchalinxixsin aj xob'il a kypa tnam qxjalil, ja nyayx chi jaw yolin tojx ky-yol qun tuntzin ikyjo cheb'a chi jaw ewin tu'n tjaw kychmo'n kyib' tu'n txi nik'et twutz kyaqen toj kob'el ja nchi nejane, me qa noqx chi iwle kyu'n (xhpint xjal xol q'aq' mo xjat xol q'aq' tjaq' k'ul) b'exsinchi okel xob'tzin te titzin ci b'ajte, mo qapa chi k'wel b'yo'n tuk'a jnilexjo ky-yajel tzenkuxjo nb'aj toj junxil tnam te Paximil.

Noq tu'n tpaja jni twutz q'ojin b'j twutz Paximil, nti'xtaq jun tumel ja tu'n kych'iya xjal toj kyaqen ex ja tu'n tjyeta kypwaq, q'anchalxixtaq yajb'il, ex toj kywutz q'inen ntixtaq kyajb'en xjal, ex ja q'anchalxixtaq ja ntixtaq mojb'il kye xnaq'tzb'il ex ajxaqtzil, ntixtaq b'inchel twutz ja tu'n tajb'en kye xjal, ntixtaq twutz aq'untl ex txqantl.

Ex ikyxo kub' qancha'lixix tzenku nchi pon kanen xjal xol q'aq' tjaq' k'ul exsin n-ok kychm'on twutz xaj ja nchiexa yolena kye tnam, kyojele b'e exsin jaxixjo ata nim twutz xjal, tzuntzin nchi yolin tib'aj kyaqen ex tib'aj kyipb'el jaa nchi tirene ky'j xhpin, me oktzin kxel ka'yinxix qa ntiqa xhpin inqaku. Me ikyxjo tzuntzin nkub' ky-yolin xjal aye i-meltz'aj xol q'aq' kyxol xhpint exqexjo xjal aye noqxtaq nchi b'et noq jayela noqtx tu'n kyanqen, tzuntzin nkylonte tzen nchi tiren xhpin ex xol q'aq' tjaq' kÅful, ja nimxtaq b'is lejo'n ti'j, xob'il ex nim ncho'n k'ub'aj ti'j.

Ajq'oxixtaq jnilexjo nb'aj kyojela junxil tnam, ja nchi jaw naje xjal toj kyja, ex ja nchi kub'a b'yona xjal qa ma chi b'ijta qa xinxqa. Ajqojxixtaq tzenku patinkataq xjal mo jun tnam kyu'n xjal jyol twutz qoj, ex joylixix kywutz xjal a nim kyxhtijemel twutz tnam te jun kojb'il, xhtij xjal twutz jun ja te nimel a ja nchi ipenen kyib' tu'n tch'iya twutz kyaqen ex te jun tb'anel tnam.

b'). Te tyupj twutz q'ojen.

Jotxsin twutz tnam xi qe kyk'uj tu'n tkub' xhqitel mujb'el nimel exsin ilixix ti'j tu'n tkub' najsete twutz q'poj a ntpayen twtz tnam te ttx'otx'il Paximil, tzuntzin nkub' ayet jun chewsil nimel twutz tnam, jun ch'isb'el twutz kypwaq, jun yob' ja tu'n tjeta twutz pwaq, ja tu'n tjeta twutz kyaqen ex ja ako b'anta kytemen xjal noq te jaa. Cheb'akutzin kub' kynik'un xjal ky'b' tu'n tkub' ikyset aj txi xhqitet twutz u'j tu'n tok mujb'et kynimel xjal te jun majx.

Qanchalxix te tkub' qe kyk'uj xjal ex cheb'aku el kyxob'il exsin cheb'aku ok qe kyk'uj kyxililex xjal tutz'en tten jutb'anel kyjol, ntixix kyxob'el tu'n kyb'et tojola b'e, exsin cheb'ajo kub' qe kyk'uj tu'n kyjaw lajen, ex ja ok kypenen kyib' tu'n kyaq'en, es kyippel kyib' tu'n kyanq'en ex txqantl. Ok q'anchalilix kye jotx xjal ok kypetb'in kyib' tu'n kyanqen twutz tx'otx' ex ja tu'n tch'iya twutz kychwinqel a ja tzunxsin nchi ipen kyib' ja tu'n kyjatatza tjaq k'as ex tjaq yajel a nkypa'n twutz tnam.

MUJB'EL KYIMEL XJAL

Noq nxi b'ijta tib'aj mujb'el kynimil xjal, me nti'x ojtzqinxix tib'aj tb'aj tzenxix taya txilnen te kye tnam. Jotxix xjal taj tu'n tok tojtzqinte a tzenxix tsaya twutz txilnen mo tzenxix toka.

Toj tnam te Txolja ntix jun xjal ajaq'nel tib'aj txilnen toklen mujb'el kynimel xjal, ilxix ti'j tu'n kyojtzqin xjal toj kojb'el tx'otx' te kye xjal yaj qun ayitzin xjaljo nti'xix b'in kyu'n ex najsinqe toj tnamb'l kawel tanam.

A mujb'el kynimil xjal, noq jun chewsil kyanmen twutz tnam xjal, qu'n noq xb'ijte tojele xob'l yol kye aye xob'l q'aq' ma chi kub' tib'a mexh, exsin ma pon b'aj jyol twutz q'ojen twutz t-tx'otx'il Paximil exsin ma chi jaw anq'en nimx tumel tzen tu'n kyaqene xjal twutz tnam, twutz tx'otx' exsin pujb'il kyib' tu'n ky-yolin tuk'a kyxb'oj. Ajq'ojxix q'amb'itz tib'a mujb'il kynimil xajl, me mina o kub' paq'b'etxix ex mina nkub' aq'net kyuk'a xjal toj kojb'el tx'otx' a ja ch'aklixix yajb'in ja mib'a chi u'jena xjal, a ntixix mojb'il twutz tnam te xnaq'tzb'il, ntix aq'untl, a ntix txa pwaq, ja nch'akb'eta yajb'el exla atla txqantl il iqen kyu'n xjal te tnam.

KYCHWINQEL XJAL TE JUNJEN Q'IJ.

NAB' ATXIX OJTXIX

A nky-yolin qtaxi atxix. Kab'la winqen ab'q'a tjaq'kux, a ja tzenkux nchi a'nq'ene xjal txqan xjal, qu'n tu'n nimxixtaq yajb'il iqen kyu'n ex nimxixtaq tz'iyjb'il iqen kyu'n, tzuntzin nchi anq'enen noq tu'n tjaw kytx'ixpen jun kyalen mo no ti' at kyuk'a.

KYCHWINQEL XJAL TE JALEN

Tu'n qyolin tib'aj kychwinqel xajl te jalen toj tnam te Txolja, nimxix toklen ex nimxix ta'ya, me wen tu'n txi qkayench'in tzen nchi anq'ene twutz tnam ex twutz ttx'otx'il tkojb'il.

1). Oktzi ko yolinch'in tib'aj kychwinqel ichin aye nchi nejan toj kojb'el te tnam te Txolja.

Aye ichin nimxix kyaqen tu'n tjaw b'ichet, nojxix xjal n-anqen ti' tawal, es nimx n-ok tpetb'in tib' tu'n kyaqen tuk'a junxil xjal noq tu'n tjyet jun jteb'en kypwaq qu'n tu'n noq ikyjo chb'aku chi anq'ene tib'aj jnilexjo nkub' niky'b'et toj ja. jotx jnilexjo ichin nimxix kyaqen tu'n tkub' b'inchet junjen nxi' tpetb'in tib' tu'n tb'inchen twutz tze, ajk'ayelqe, aj txunelqa, aj siwelqa, aj b'inchel jaqe, aj b'inchel xb'alenqa, aj awal itzajqa, aj b'inchel k'wilqa, aj b'inchel xb'alenqa, aj b'inchel xk'onqa te toj twi' ja, junjentl ajch'isel ritqa, waqkx, ex txqantl. Jotxjo jni' lu'n tb'insen ex txnaqtzb'el junjen xjal te toj tnam noq tu'n kyanq'en.

2). Kychwinqal qya aye nchi nejan toj kojb'el te tnam te Txolja.

Ayetzin kyaq'en qya noq b'inchel toj ja, ex tzenkuqe junxel nchi mojen tu'n tch'isena jun jteb'an pwaq tu'n tmojet toj ja tzenku lo: tu'n tch'iset jun tal kuch, tu'n tch'iset jun jteb'an talen eky', junjentl ntpetb'in tib' tu'n txi k'ayil tuk'a tchmil, ex tzenkuqa junxil nchi kyipen kyib' tu'n kyxi xnaq'tzb'il kyib' toj jun ja te xnaqtzb'il.

A kychwinqel qya te toj kojb'el te tnam te Txolja, nimxix noq nimenku kychmil kyu'n ex noq b'in kyu'n ti'x ktzajel tq'ma'n ichin, qu'n nti'xtl juntl tumel ja tu'n kyxiya b'inchel twutz kychwinqel te junjen kye qya, jnilexjo lo twutz yajiltzin qu'n tu'n ntix jun tumel ja tu'n kyxi'ya aq'nel ex ja ntixix ja tu'n kyxiya xnaqtzb'il kyib' toj jun ja te xnaq'tzb'il, nti'x juntl tumel ok k-okel kyb'antzin kyib' toj jnilexjo lejo'n kyu'n ex k'wel kypa'n tzenx tokle chwinqal.

a). Kychwinqel ichen te toj tnam te Txolja.

Nimxix ichin n-ok kypwtb'en kyib' tu'n kyxi' k'ayel, junxil al b'inchel xb'alen, junxil ntch'isin tib' tu'n tb'an twutz u'j kyu'n, junxil nchi ipen kyib' tu'n tb'ant twutz u'n kyu'n, ex junxil nkypetb'in kyib' tu'n txi kayet twutz kytx'otx' exsin n-ok kykayen kyawal ex kyalen.

b'). Kychwiqel qya toj tnam te Txolja.

Noq junjen qya noq ayonku kyu'n aj tpon kyin kychmil jun jteb'an pwaq toj ja qu'n atzin kyaqen noq b'inchel jnilexjo at toj ja, ex tzenkuqex junjentl nchi ipen kyib' tu'n tpon kanen jun tal twutz pwaq toj ja, tzenku: tu'n tkub' jun tal kyk'axhjel, nchi ipen kyib' tu'n kyxi xnatzil toj jun ja te xnaq'tzb'il noq tu'n tjyet jun tb'anel kyaq'en, noq tzenkux nchi jyon jun tumel tzen tu'n kyanq'ene.

A kychwinqel xjal te jnjen q'ij noqx k'wel kypa'n tzenkux twutz, txolilix txqan yajb'il a qiteten tel kyu'n tnam xjal, qu'n ti'xix aq'untl, nti'x tjole pwaq, ntix mojb'il tib'aj ajxnaqtzb'il kye talk k'wal, kye ku'xen ex kye tij xjal, ex ntix mojb'il tze'n tu'n kych'iya xjal toj kyawel, ex atla txqantl. Jotxsin jnilexjo il nb'aj kyi'x xjal jun tijxix yajb'il me axix kyijo xjal nchi nejan te kojb'el te tnam te Txolja.

Me wenxix tu'n qyolin tib'aj kych'iyel toj kyaq'en jun jteb'an xjal , qu'n tzunx n-ok kypetb'en kyten ex tb'anel kyxhtijb'al nkyjonxix jun tumel tzen tu'n kyetza tjaq q'as exsin kyjo'n jun tumel tzen tu'n tjyeta jun jteb'an kypwaq, atla junjen nkub' kyxikyb'en jun tal kyk'axhjel, k'ayel xb'alen, k'ayel xjab', k'ayel itzaj, kayel nikyb'al wab'j ex atla txqantl. Junjentl nxi tq'on tib' tjaq xnaqtzb'il noq tu'n tjapin b'an te jun tb'anel xjal ex ja tu'n tu'n tela twutz tpwaq. Q'anchlxix noq jun jteb'en xjal o japin b'an jun tb'anel tja, jun tkxb'il kar tekux, jun kxb'il yolb'il, kxb'il te cheb'l b'utx, jun paqx k'antzil wab'j, kxb'il te b'ib'ajtz ex txqantl.

TELNIX XJAL TOJ KYJA

Nimxix xjal n-ex naj toj tja mo nkyij tjilen tja noq tu'n tpaj ntix t-pwaq nel jyet ja najlexix ex mix alquk'e aku jyeta aq'untl ja tu'n tjaw ch'iya ex ja tu'n tkamenta jun jteb'en twaq tu'n tu'n token te tchwinqel ex ja tu'n twana tyajel. Qa jun xjam mix jax njeta jun taq'en ja tu'n tanq'ena ex te tyajel toj tnajb'el, noq tu'n tpajo il lo ilxix ti'j tu'n tex naj toj tja exsin kxel jyolte tpwaq toj junxel tnam noq tu'n tanq'en.

Q'anchalxix yajb'il tok kyi'j nimxix xjal toj tnam te Txolja, jun ti'j jilb'el kye xjal ja junjen q'ij itekux toj tqan yajb'el, jun tijxsin kyxk'oj iqen kyu'n te junjen q'ij ex jun tijx cho'n anmen te jotx twi' tnam.

A kyelnex xjal toj tnam q'anchalxix tze'n nchi ex xjal toj kyja b'anqela tejexil tx'otx' te Paximil mo kyoj junxel tanm toklen t-ten te tx'otx' te Paximil, nimxix xjal nku'x toj mb'alj tzen aj tpon kanen tq'ijel xilen kape ex nix xjal nxi' toj noq tzen aj tpon kanen tq'ijel xilen noq, txqanx xjal te tnam xjal nxi' tlimo'n tib' toj junxel tanm tejexe t-tx'otx'il Paximil mo jlajxe ja nxi' tkayena qapa k-okel yolen tu'n taq'nen kyu'n xja te Chyapas, qu'n tuntz'in nxi' kyb'in ajxilil kye nti'xix twutz xilen kape toj tx'otx' te Paximil, junxi nchi ex toj t-txu tnam te Paximil, ex junxil nciex toj nim tnam te Estados Unidos, noqx tu'n tyjet twutz tpwaq. Noq tu'n kyaq'en xjal aye nchex naj toj kyja ajq'ojxixsin kye noq tu'n kyaq'en ma chi jaw ch'iya q'inen ex kye xjal a at aq'untl kyuk'a.

Tzmaxix jalin q'anchalxix xjal toj tnam ex tzenkuxjo toj kob'el tx'otx' te tnam njyo'n aq'nel tu'n kyxi' xilel kape toj mb'laj, me noqx tze'n aj tpon kanen tq'ijel xilen kape ex tzenkuxjo qa tajxtaq q'inen tu'n tok tetzb'en te taqmel mo noqx tzen taj aq'untl toj mb'al kape mo toj noq.

Me ayitzin xjal xk'amil xjal, chjonqitzin ti'j kyaq'en aj mos ex tij junjen aq'nel n-ele twi' kyk'uj.

Junjentl nkyij kytzaqpin kytata, kyja, kytx'otx' ex xqantl. Q'un tu'n ntzaj q'on jun kyaqen tb'anelxix wen kyu'n q'inen, mo aye xjal nim kypwaq nkub' kytzyu'n twutz taq'en jun xjal mos yaj, qu'n a taq'en tb'anelxix ex lejonxix twutz kyu'n exsin n-ok kypetb'i kyib' tu'n tel b'a jun tb'anel aq'untl kyu'n.

Junjentl tzu'nx kypetb'en kyib'tu'n tq'ub' kyq'on jun twutz kyk'axhjel exsin kyjyo'n jun tummel ja tu'n tkub'a qeya twutz k'ab'il mo jun nim b'e ex ja te k'ayb'el te junjen tnam te tx'otx' te paximil noqx tu'n tjyet jun jteb'en kypwaq qu'n noq ikyjo nkyjon jun tumel tu'n kyanqene es tu'n tjyette jun tile kye.

AJKAWELQE

Aye tij xjal ntixix kyoklen kye xjal te jalen ex ntixex kytemb'en tu'n kyok te jun kawel, me atxisin ojtxix nimxitaq kyoklen te tb'anle kawel te tnam mo twutz kojb'el tx'otx' qu'n tu'n nimxix toj ojtxix kynab'l ex k'unxix tb'anel kawb'el a kyij q'on kyu'n ojtxix qyajel. Ayixixsin tij xjal nejenelqe nchi kawen ton tnam mo toj kojb'el tx'otx' te tnam ex q'uqlixix kyk'uj tnam xjal ti'j teyele junjen ti'j xjal tu'n tkub' kypjun jnilexjo il ntzaj kyxol tnam mpo twutz tx'otx', ayixixsin ajq'ij tb'anilixix kyoklen te kye xjal ex te jni' il n-l kanen kyxol tnam.

Me twutzxix kye a jalen aye xjal ajkawelqa toj junjen kob'el te tx'otx' te Txolja qxjalilqa ex atzin junjen kawel cheb'a nik'unkuqa qu'n tuntzin tpjet jnilexjo il ti'j tu'n tkub' b'inchin toj kojb'el te tx'otx' es a tu'n token kye jnilexjo xjal. Junjen yek'b'il tzenku lo, tu'n tokx a' tojela kyjayela xjal, tu'n tjaw b'inchet jun kyja skwelil ja tu'n kyxnaq'tzina, tu'n txi b'inchet twutz b'e ex txqantl. aye ajkawel nik'unkutzin kyten kyjalun, xjal nejenel, tkab'in nejenel, k'ul twutz pwaq, b'inchil wutz u'j ex aye mojb'elkye nejenel, ex tzenkuqo aj kawel twutz kojb'el tnam, ex txqantl xjal cheb'aku nik'un kyten te kyex xjal aye najleqe te junjen kob'el tx'otx', qu'n noq nxi' kynab'len te jun tb'anel tnam.

Ayitzin xjal a at kyoklen te twutz tnam sk'onqetzen kyu'n xjal aye najleqe toj junx kob'el tx'otx', qu'n tu'n tb'anel kyxhtijb'el ex at amb'l kyi'j tu'n kyaqen twutz tnam. Atzin lu'n jun nim ipel tok kyi'j qu'n tu'n q'uq'l kuyk'uj a ja tu'n tch'iya twutz tnam ex jnilexjo tu'n token kye.

KYITZ'JLEN NE'XH

¿tzentzin n-anqene jun tal ne'xh?

Tzuntzin xi petb'et tu'n txi joyb'aj jun yoq'el tu'n txi lolte yab' qya tzen aj tul tal, tu'n tklet titz'len ne'xh. A tmojb'il yoq'il noq aj titz'jen jun tla n'exh. Atzin aj titzjlen ne'xh o'kxsin kel tmuj tuk'a ne'xh ex tu'n txjet tal ti'j ne'xh tuk'a maq'maj a', tuk'a ta'l q'anmel k'ul (ta'l k'ul noq o'x yoqel ojtzqilte) q'aq jab'on ojtzqinxex kyu'n xjal te tnam ex nim toklen kyu'n, exsin b'e'x kxel oqxenet te jun tij xjalk tu'n txi' meqet tuk'a mo tmuj ne´xh toj juntb'anel tkub'el, me kxe'l meqet tzenkux tnab'l te junjen xjal.

Me b'exsin kxe'l txqet t-chuj iky' chujel (chuj tb'i ojtzq'in) a tb'anelxix te kychuj qxjalil. Te iky' chujel oktzin kxe'l txqet ttchuj te qlixje aj tok qniky'in te junq'ub'x q'ij, ajtzin tjapin b'an jun seman aye tchuj oktxin k-okex noq toj qniky'en mo qale ex atzin tel tal ne'xh oktzin k-okex tchuj noq toj kakab'chaq q'ij me noq tzenx tyaya ne'xh toj tchwinqel.

Atzin tal ne'xh tzuntzen k-okel lemetxix wen ti'j tzi txan q'aq a nya' kyaqxex wen. Atzin xjal k-okel maq'tzinte tal ne'xh ok k-okel tjyo'n jun tl b'ux b'unen wen exsin k-okel tptzo'n tq'ob' tuk'a xb'alen ex cheb'aku k-okel tq'on ti'j q'aq exsin cheb'ajo k-ikela tu'n tib'aj tchib'jel tal ne'xh, me noqxixsin ayo'n tu'n tal ne'xh exsin mi najxen amb'in qu'n tzuintzin n-mi'xhen, atzin lu'n tzajnetxsin atxix ojtxix, tzuntzin n-oken lo qu'n tu'n mina yab'te ex mi tz'ok juk'le tu'n che'w, kyaq exsin tu'n mina tz'oka xjos ti'j; atzin tal tlemel tzuntzin n-oken te qlixje te qale ex tzuntzin n-oken toj kyaja mo qaq xjaw me noq tzenx tch'iy ex toj tchwinqel te junjen k'wal.

¿Ti'tzen nb'aj tzen n-el tz'aq tmux jun tal ne'xh?

A kynimel ojtxix xjal mo aye qchman ajqa ma tze'el tz'aq tmux k'wal me majxixisin kjawex toj twi' jun tze qu'n toj kynab' aj kytijen k'wal b'anxixla chi ex tja jni' kuj taya toj chwinqal, mo b'apula k-okex toj tje chej, qu'n tu'ntzin b'anxixla chi chejen wen aj kytijen mo tze tu'n kylonte kychwinqel, a kymux tziuntzin n-okx tja jun chemj, qu'n toj kynab' ok k-okel te jun tb'anel twutz chemj, mo txe jun kax tu'ntzi b'anxix tok tkayen twutz tpwaq ex atla txqantl. tzuntzin nkub' b'inchetjo lun noq tzenx tb'ix Mamb'aj tib'aj tk'wal q'a mo txinj te jun chi'j.

¿Titzen nb'aj tzen jun tal ne'xh tzunx n-oq'x?

Ayitzin qxjalel te qtanmen Mam tb'anelxsin kynab'l, kyxim ex tzuntzin nchi po'n ti'j tzen tzunx n-oq'x tal ne'xh, tzuntzin nchi pon ti'j qa wutzb'aj tok kyi'j, mo tzen qa chon k'ub'aj kyi'j, mo junxil yab'il. Qa ayitzin yab'iltzjo, kyojtzqinxixsin tixix q'anmel kyaj mo tixex q'anmel kxe'l kye, qa kujxix taya yab'il kye ajq'anel toj ja itetzin tij xjal a tb'anilxix chi q'anen tij noqx alkye jun yab'il. Te kye xjal j'alen ex kye xjal a at jun tal kypwaq nimx nxi' jyolte tq'anmel toj jun ja ja nk'ayejtze q'anmen, jun ja te q'anmel tnam, jun nim ja te q'anel tnam mo jun ja te twi' wi'yil ja cheb'aku nchi ok ka'yet yab'.

KYCHWINQEL K'WAL.

Noq tu'n txqanx twutz yajb'il a kypa tnam xjal te toj kojb'el ex kye xjal yajqexix wen, ch'ima ky-kyaqilixix twutz k'wal tzuntzin nxi kykayen toklen aq'untl kye t-tata exsin nchi mojen toj muxhele aq'untl exsin tzun nten kychwinqel tzenxjo kye kyman. Nimxix twutz k'wal nya' tojtzq'in jun tal tzaqchb'il a n-oken kyu'n kyxhtyan mo a saqchb'il nchi b'an ja'len qu'n tu'n nimx yajb'il kyi'j, ti'jx k'wal toka qa ma kub' tb'inchen jun tal tsaqchb'el ti'jx noq alkye k-el jyet tu'n , tzenkutzintzjo jun tal t-sol tze te jun tal tkar, mo jun tal tlok' jun tal tze kujxix wen te jun tal tchej, jun b'ajlaq, jun tq'ob' tze a kujxix taya wen, b'anqala k'wel kyb'inchen ch'in tal xoql te kysaqchb'il ex txqantl. qa ntixjo nji' lun xjyet tu'n, otzin k'wel tpan tzuntzin nxi' saqchal tuk'a jun tal twixh tuk'a jun tal tchit, ex txqantl. mejqa mina oktzin kxe'l aq'nel tuka Mamb'aj, tu'n txi jyol twa jni' alumj, mjeqa mina jun tal k'wal kyk'lel rit.

Me ayitzin tal k'wal txin ayitzin chi xel kayilte mo chuchilte kyitz'en ex petb'intzin kyib' tu'n kyxi' b'inchel jni at toj ja tuk'a nana. Me ayitzin tal txin qa ma tench'in amb'il kyi'j oktzin chi xe'l saqchal tuk'a jni' k-el jyet kyu'n, me tuk'atzin saqchb'il k'el jyet twutz tx'otx', tzenku: tu'n kyxaqchan te b'inchel wab'j tuk'a ch'in xoql, tu'n kyxi' jyolte jun tal kynexh te t-txaqwn b'uxh mo kxel kub'inchen juntal kypach te t-tx'aqen u'j, ex txqantl.

Me ikytzin nchi anq'ene tal k'wal q'a ex txin a qiteten kyten tuk'a txqanx yajb'el tojele kojb'el te tnam te Txolja ex noq jun jteb'en q'a k'wal ex txin k'wal nchi anq'en tzenkux toj tchwinqel jun tb'anel k'wal.

KYXNAQ'TZB'IL K'WAL Q'A EX TXIN

Jotxix jniqe tal k'wal nche'x toj jun ja te xnaqtzb'il b'inchenku tu'n kawb'el tnam tu'n kyb'ant kytz'ib'en ex kyu'jen tzuntzin nchi okx skwelil te jwe' mo qaq ab'qa ex b'anxix tu'n qyolin tij txqan k'wal q'a ex txin aya mina nche'x toj ja te xnaqtzb'il quÅfn tu'n mina nchi tzaj mojen kyu'n kytata qu'n tu'n nti'x kynab'l q'uqle ti'x twutz u'j ex nti'x b'an kyu'n tib'ajal u'j, tuntzin kyk'ex tu'n mina chi skwelina kyk'wal, ex q'anchalxix nti'x mojb'ilye tu'n tata ajkawel tnam ex kyu'n xjal a nimxix kypwaq ja tu'n kyaq'enen tze'n tu'n txi nimsetxix twutz xnaqtzb'il ex tu'n txi txjet kynab'l jniqe xjal. Atzin juntl il, a twutz pwaq nti'xix tjoletz ex nimxix b'is tok kyi'j xjal tze'n tu'n tjea, ex at juntl il tok kyi'j a tzenkuqe tal k'wal yab'qa toj kych'iy mo yab'qa ti'j kynab'l axixsin yab'il lun mina nxi chq'onkye toj jun ja te xnaqtzb'il me ex nti'x jun ja, ja tu'n kyxiya q'anil kyib' ex ja tu'¿n kyok ka'yena, ex junxil il lijo'n kyi'j tal k'wal q'a ex k'wal txin a ky-ky'exix tu'n txi toj jun ja te xnaq'tzb'il qu'n tu'n iky'enqe tu'n ntix jun tal kypwaq, mo noq tu'n tal kytenx ex tu'n iky'inqe ti'jx ky-yol, ox ok chi jyeil ti'j junxil il ja toj junjen kojb'el tx'otx' nti' ja te xjanqtz'b'il ex ja nti'ya ja tu'n tjapin b'aj qaq xnaqtzb'il te kye k'wal, ex noq ja taya oxe ab'qa te xnaqtzb'il, mo ja nti'x ajxnaqtzb'il toj kojb'el tx'otx'.

Ex qanchalxix kye nimxix k'wal q'a ex txin nchi okx toj jun ja te xnaqtzb'il me mina njapin b'aj twutz kyxnaq'tzb'il qu'n tu'n aye Mamb'aj cheb'aku n-el b'aj kypwaq ex nti'xix kypwaq ex nimxix yajb'il tok kyi'j atzin jni' lu'n mina ntziye ja tu'n tleq'eta twutz kyu'j ja tu'n kyxnaqtzina, kyxb'alen, kyxjab', ex ti'jo txqantl ntzaj qanen kyu'n ajxnaqtzb'il, ex noq tu'n jni' il lo exsin ilxix kyi'j tu'n kyxi' toj tqan mb'alj xilel kape te mojb'elte Mamb'aj noq tu'n tktxet twutz kyk'uj ex tzen tu'n kyanqene te te kyex ex te kye jni' ky-yajel.

KYCHWINQEL KU'XEN

A kychwinqel ku'xen q'a ex ku'xin txin noqx alkye jun kyaqen aku b'an me ikyx kyaqen tzenku kye jun tij xjal ja ilxix ti'j tu'n tel b'aj jun kyaq'en. Ex tzenku ja tu'n tkub' qeya jun kyxim ex b'an chi q'man tib'aj jni' nkylo'n, ex noq tunxjo kynab'l tzuntzin nxi' kyb'etzb'in tze'n tu'n kyanqene.

Atzin kuxen q'a tzuntzin nxi' tpan jun amb'il ja tu'n t-txiya yolil kyuk'a txb'oj, qa ma tz'ok tkayin qa at amb'il ti'j, b'ampila tu'n txi' xpo'tzil kyuk'a t-txb'oj, mo ma txin kayilte jun ponex txin, ex atla txqantl.

Me ayitzin ku'xin txin tzuntzin n-ok kypetb'in kib' tu'n kyxi' b'inchel jni' at toj ja tzenku b'inchil twutz wab'j, tu'n kyxi' chel wab'j a kywaxix jotx jni' xjal te tnam, mejqa mina nkyjyo'n junxil tumel ja tu'n kyxiya chel b'utx toj cheb'l kxb'il, ex nixix kyaqen tu'n kyx'i lol twutz alumj a jnilexjo at toj ja ex atla txqantl. atzin kuxin txin cheb'a kayinqexix tu'n kytata tu'ntzi nti'x tok b'ajkye toj b'e, mo noqx ti'x kyok b'ajte toj kyq'ob' xjal nya wen; me tzuntzin nkub' kyb'inchen kyib' qu'n qoqx alkye jun amb'il ja pon kanena jun xmoxil kyi'j.

XNAQ'TB'IL KYE KU'XEN

Noq jun jteb'en ku'xen nchex mojen kyu'n kytata tu''n kyxi' xnaqtzb'il kyib' toj jun ja te xnaq'tzb'il, tnikyjel twutz xnaqtzb'il, tu'n tjapin b'an jun kyxnaqtzb'il ex ja tu'n kyxi' uxsite toj jun ja te xnaq'tzb'il; junjentl nkypen kyib' tu'n tjapin b'aj jun kyxnaq'tzb'il nchi aq'nen ex nchi xnaqtzin kyib', tzuntzin nchi aq'nen noq tu'n tknet jun kypwaq te chojb'ilte twutz kyxnaq'tzb'il exsin nchi jyon kypwaq te kyex, noq tu'n nxi' kykaye qapa tzen k-elele jyeta jun tb'anel kyaq'en te jun nchi'j. Ex q'anchalxix kye nimxix xnaq'tzb'il tib' nxi txikyb'en t-txnaq'tzb'in exsin mina npon b'aj twutz txnaq'tzin qu'n tu'n nimxix twutz yab'il iqen tu'n, qu'n tu'ntzin nkyij tzaqpi'n twutz txnaqtzb'il exsin ntjo'n jun tumel ja tu'n txiya aq'nel qu'n ok tumeljo ja tu'n tanq'ene.

TXOLILX KYYAJIL

A kyajil txolilix tnam Mam mujlikxix twutz kyxolilix exsin ikytoklen kyjalun: tu'n Mamb'aj, txub'aj, k'walb'aj a nti' kyxu'jel, ta'xha, jun mo kab'a k'walb'aj a o chi jaw meje, te jun mo nimx txqantl twutz chMamb'aj. Exsin aj tmeje' jun k'walb'aj b'exsin a Mamb'aj kxe'l mojente tuk'a ch'in t-tx'otx' exsin kyaqilx chi mojen tu'n tjaw b'inchet jun tja. Jotxsin jniqe twutz ky-yajel nya'xix naqchaq nchi nejana ex junxil qu'n tu'n ti'x at te ok chi xel laq'e naqchaq jyol jun tumel tzen tu'n kyanqene.

NAB'L TWUTZ MEJEB'EL ATXIX OJTXIX

A kymejeb'en xjal te tnam te Txolja nimxix ky'iwlil twutz. Aye xmoxel ok k'wel kynimen ex k'wel kytziyen txenxix toka tumel, tzenkutzintzjo lun kykab'el qa ex txin xmoxb'il kyib' ok k-xel kyq'on kyib' toj tq'ob' Qman tokx toj kya'j, tuk'a kyman, kyta'xha, kytz'in, kychela ex twutz jni' tnam. Noqx aj kymeje nimeqetzin kyu'n k'wal ex tu'n tnam. Ok qo yolil tib'aj kymejeb'el xjal kab' winqen ab'q'e ojtxix.

a). Cheb'a ka'yenqa tal txin.

Atxex ojtxix chb'a ka'yenxixtaq tal txin tu'n nti'x tu'n kyok b'ajte, qu'n aj kymeje' nti'x jun ichin chi okel tzyunkye exsin tu'n kyjaw meje oktzin k-okel tojtzqi'n q'a xmoxil tzenxix toka tchwinqal txin exsin qa tajxix q'a ti'j txin, ajqa ikyjo, atzin kuÅfxen q'a oktzink-okel tjyo'n jun tumel tze'n tu'n toka toj tja ku'xin txin.

b'). Tze'n nxi qanmet jun txin.

Nimxixtaq tumel tzen nxi' qanmet jun txin.

Kyuk'a junjen xjal b'exsin nxi' kyewen ku'xin txin tuja ajtzin txi qanmaj kyu'n xmoxil, b'exsin kxel t-tata ku'xin txin yolil tuk'a t-tata kuxen q'a ex ante txin cheb'a jpunx tuja tu'n mix a'l tu'n tloente, noqx tzenx k'wel ky-yolb'in Mamb'aj b'exsin kxe' txket txin ajqa ma kub' tziyen a qanmetz qu'n twutzsin txin kxel q'meta jtexix amb'il k-okel kyoj tzqi'n kyib', tela jun ab'qa mo nimch'il toj ab'qa ja tu'n tok kyojtzqinxix kyib' ex ja tu'n tok kywensin kyib', mojqa a ku'xen q'a kxe'l aqnel ex nejal toj tja txin.

Junxil nxi kyqanen k'uxen txin te junxil tumel kyjalun: tzuntzin nxi' qanmet k'xin txin te tnejel maj, ajqa ma tzaj tziyen toklin kuxin q'a, oktzin chi kyjelkuxix ti' q'ijel chi pon kanen tuk'a txqan kyoyaj, atku jni' oyaj nxi iqb'aj tuk'a chej, chi'l pan, chokolat, ixi'n, chenaq', sich', q'en, txb'alen te ku'xen txin ex kxe'l ajlet jun jeteb'en pwaq te chojb'ilte kayb'il twutz chwinqel txin te t-tata txin exsin kxe'l kayetxix alkye q'ij chi jawe mejeye.

Toj junxil tumel nxi' iq'b'aj jun xjal tu'n txi' xjelil mo tu'n txi' qanele txin te txujel ku'xen qa, ex jun xjal a nimxix txhtijemel te qanmel ku'xen txin te txu'jel ku'xen q'a, tu'ntzin tkub' tziyen tu'n t-tata txin qu'n noq ikyjo ok k-oksela toj tjatxin. Atzin ku'xen q'a k'lentzin tu'n t-tata, txub'aj, taxhe ex yaye mojqa mina ok kxe'l k'len kyu'n xjal a nim kyoklen toj kojb'el mo te tnam, noq tu'n toksen ku'xen q'a toj tja txin exsin jaa k-okele kyxmoxen kyib' texa aj tb'ajo jni' xb'aj yolb'it ti'j.

c). Atku kujxix tu'n kyokx toj tja txin.

A ku'xen q'a aj tpon kanen qanelte ku'xen txin te txu'jel atku npon kanen kyuqa xja a nya' wenxix kyanmen ja nchi etz lejona toj ja ex ja k-eletza qona xhb'ajen a' kyi'j mojqa mina kyqa' a', mejqa mina b'ex keletz jpu'n tjpel ja kywutz, ex txqantl. Ajqa nimxixtaq tb'is ex tnamb'l ku'xen q'a ti'n txin, tojxi tkyajen maj ok tpayb'el jnixjo ikyb'el ti'j ex ok tlimonxix tib' tu'n tkamb'et tb'is mejqa mina noq k'wel txquqen exsin k'wel kyolin tzen tu'n kytzaqpaja ja tu'n kynejana te jun majx ja nti'x tqanel kxe'l kyq'on te kytata.

A twutzjo jni' il nb'jataq lo qu'n tu'n aye q'a ex txin mina nchi kub' qe yolil tuk'a t-tatitxin ex mina nb'antaq ky-yolin kyuk'a tman txin ex mix ja n-ok kyxb'ojena kyib', noq tu'n tpaja lun nimtaq q'ojen tkux ti'j kyanmen, qu'n tu'ntzin noq kxel txq'uqen q'a txin ex noq toj ewjel kxel tina ja tu'n kynejana junx ex nti'x kxel kyq'man te kytata, atzin tb'i lu'n elq'el xu'jel.

MEJEB'EL

NAB'L ATXIX OJTXIX

Alle mejeb'el tzuntzin k'wel b'inchen tuk'a jun tij q'ij, ja nchi oka chmeta nimxix xjal te iky'silte, tzenkuqe at kyoklen kye mejeb'el, ajxb'ojqe ex xjalqa a nimxix kyiklen te twutz tnam, tzenkuqe tij xjal ja tkub'a jun tb'anel kyq'uqb'el ja tu'n kytzaja kaweta ajmejeb'el tzenkux o kylonte toj kychwinqel te teyele junjen tij xjal ja tu'n toka kyjo'na jun tumel tu'n tkub' najset twutz il ex ja tu'n tk'achja il tuk'a tb'anel kywi', ex ja tayaxix il. Tzenkux kychwinqal xjal atxix ojtxix aye mejeb'el chi iky'el mejeb'el twutz junjen taxh xjal mo kywutz tij xjal tuntzin kykub' ky'iwlen exsin ktzajel mojen tuk'a tb'anel yol ex yol ja tu'n kyximene tib'aj kychwinqal ex tib'aj il qapa pon kanen toj kyja, me tojo tb'anel q'ij te mejeb'el tb'anilxix tk'ok'jel insiens junx tuk'a tk'ok'jel mir, qu'n te kye xjal nimxix toka, ajtzin tb'ajo jnijo twutz mejeb'el, b'exsin k-ajq'ojel poq'chel q'aq', exsin ok kxe'l jun kyk'wa' xhb'aj ex jun tb'anel laq wab'a tuk'a tchib'jel wakx ex nimxix itzaj tku'x toj ex b'inchenku tuk'a ch'in ich mo noq tzen kyaj xjal tu'n tb'anta.

TWUTZ MEJEB'EL TE JALEN.

A kychwinqel ku'xen te jalen tzuntzen n-ok kyojtzqin kywutz toj kyxb'ojb'en, exsin cheb'aku k-okel kyojtzq'in kyib' ajtzintq'anex kyxim ja tu'n kyjawe mejeya, me noq kukxjo cheb'aku k'wel ky-yolen twutz kytata (kyman txin ex qa) exsin k'wel kyb'inchen kyibÅf tu'n kyjaw mejeye toj ja te kawb'el, toj tja kynimil, mejqa mina te noq k-okel kymujb'en kyib'. Exsin atku at txin b'ex nchi kyij tzaqpi'n tu'n kychmil mo noq nchi kyij q'on tuk'a jun kyal, jun nim b'is ja namx kyq'anemex kynab'l xjal, mejqa mina tu'n mina n-el kyniky' kyxolx ex ntix kyojtzqi'n tib'aj tzenx toka chwinqal.

KYCHWINQEL XJAL MUJLE TA'YA TUKA KY-YOL EX KYXB'ALEN

a). ¿titzin b'is at tib'aj twutz yol Mam?

A twutz yol ma ju k'uxb'el ja tu'n ky-yolina xjal: ex tanmexix te jun ky-yajel xjal te tnam qxjalil Mam, tojtzin junxil tumel tumel ja nkub' kyq'mana xjal ex tzenkux kynab'l xjal mo tzenx kykaylen twutz tx'otx, qu'n tb'anilxix txilnen tumel toklen tb'is, qu'n junxix toka tuk'a kyten xjal ex tzenxix tika kyb'is xjal te tekux twutz ky-yajel. A twutz yol nimxix tipb'el ex toklen kye xjal, ex jun k'uxb'el ja tu'n tokena tu'n ky-yolena xjla tib'aj tx'otx'ex ja nim toka tuk'a tyajel ex ja njaw ch'iya jun tnam ex jun makb'el ja tu'n kymujb'ena xjal kynab'l twutz ky-yajel.

b'). A toklen yol kyxol xjal te tnam te Txolja.

Ky-yaqilxix xjal nchi yolin tojx ky-yol Mam, qu'n axixjo yol b'an kyu'n te xhi jaw ch'iy ex a n-oken kyu'n ex te jotx twutz tnam te Txolja. Tzuntzin nyolet toj ja, kyuk'a xb'oj, kyuk'a kompala, toj chmob'il, toj xpotzb'il, toj k'ayb'il, toj xob'l yol, toj aq'untl, toj kynimel, ex txqantl.

Q'anchalxix kye nimxix xjal tzenkuqe tij xjal ex k'wal tzuntzin nchi yolin toj ky-yol, me at nimxix il qu'n nimxix xjal mib'en tz'ib'ente ex nimx xjal mina n-ujete twutz yol Mam, me twutzxix noq jun jteb'en xjal b'an u'jente ex tz'ib'ente qu'n tu'n nchi ipen kyib' tu'n tetz b'an jun twutz u'j kyu'n.

Wenxix tu'n txi xhch'et kye at nim xjal ajyeb'elqe twutz ujqe mo ajxnaqtzelqe kye ja te xnaq'tzb'il te kye tal k'wal ja b'an chi yolina toj yol Mam me ikyxo b'antzin chi u'jen ex chi tz'ib'en twutz u'j toj qyol Mam, nimxixqe ajxnaq'tzel ex b'aj kyxnaq'tzb'il toj jun ja jaa nchi etza b'anta ajxnaq'tzil toj kab' yol kyxhtyan ex toj qyol Mam te tnam te Txolja, ja n-ok okseta twutz qyajel ex yol a kyij q'on kyu'n qchman ojtix xjal Mam, tzmaxix jalin tzunxsin nxi aq'net tu'n tkelt twutz qyajel.

Tojela junjen ja, tb'anilxix tajq'ojel a tb'anil ky-yol ex jnilexjo kylonte te ojtxix ex jnilexjo kub' q'ma'n kywutz tu'n kychman, tb'anel tzajtzin ex twutzxix jun spiky'eb'el te toj qxopen, a kjyetel qu'n tuk'a ta'xha tzuntzi nchi yolin tib'ajo kyb'inte es kylonte a kub' b'aj ontxix wen tib'aj kojb'il ex te kychwinqel. Te junjen q'ij te kychwinqel xjal, tzuntzin kyxnaq'tzin kyib' ja nkub' kywab'ena te kychwinqel, atzin kyten wenqixix wen ex cheb'a nimenku kywutz ex twutz aqnelqe, tzenku jun twutz chemj kye te junjen q'ij cheb'aku njaw b'inchet te chwinqel. Jotx jni' lun toklen te junjen twutz kyaq'en ex kylonte ex twutz kyaqen tib'aj ky-yol ex kyten ja n-okenen te tab'anel xhtijb'al.

Wenxix tu'n txi u'xet kye aye tnam xjal Mam te Txolja, tzuntzin nchi xnaqtzin tunxix tb'an ky-yolin toj tyol kyxhtyan mo toj tyol mo's, qu''n tzuntzin n-oken kyu'n tu'n kyyolin kyuk'a kyxhtyan xjal mo aye xjal mib'e nchi yolin toj qyol a n-oken kyu'n xjal te tnam te Txolja, ex q'anchalxix toklin ky-yol mo's ku'n xjal te tnam Mam ja nchi xnaqtzina kyib' tu'ntzi mina chi kub' xmayina kyu'n xjal mo's.

b'). Kyxb'alen xjal te tnam Txolja.

A tb'anilxix kyxb'alin xjal te tnam te Txolja ok kxe' chiky'b'et kyjalun.

Atxix ojxix aye ichin tzuntzin nchi oksen kywex ex kymixh moj sjanen a xb'alin b'inchinkuxex kyu'nx qxjalel te tnam Mam te Txolja, kyxhmo'l b'inchinku tuk'a txaq palm, kyk'alb'il kyaq a n-oken te kyk'atz, kysut kyaq, exsin nchi okxin kyxjab' te kyqan.

Atxix ojtxix aye qya tzuntaqtzin nchi okse kykolb'el kyaq kayen tuk'a tal xhqiten q'anxixwen, kyan q'aq', kypas tza'j kayin tuk'a tal pich'ila toj, jun tal kytxow a nimxix xhqien kayen, jun tal kysip de nimxix kayen txhqiten a n-oken te kywi'. Jotxsin jnilexjo kyxb'alen b'inchenku kyu'nx qya te tnam.

A iky'b'el twutz qxjalil kyu'n kyxhtyan nimxix kypante tnam xjal, ik'b'el kyojela ja te xnaqtzb'il, iky'b'el toj ja ja nchi pon kanena tnam, toj tja Dios ex txqantal. Kyunxix xjal mo's, ja cheb'a jaw naja jnilexjo tb'anel kyxb'alen xjal kye qxjalil te tnama Mam te Txolja, cheb'aku el jaw naj tkayin kyxb'alen a ayixix b'inchilte ex tzmaxix jalin nti'xix xjal b'inchil twutz xb'alen a nimxix token kye xjal noq o'kqex tal tij xjal.

Kyxb'alin xjal te jalin.

Q'anchalxix kye a jalin minatzin nchi oksinxjal tib'aj ojtxix xb'alin a q'onkj kyu'n ojtxix qyajil te tnam te Txolja me axixjo kyxb'alin ichin, ky-kyaqilxix xjal n-oksin kyb'alen noq tzenchaqku ex nchi ojxen kyxb'alen tzenkux taya amb'il te jalen. Axjo txixpel kyxb'alen tzuntzin nkub' tyek'in ja ma chi kub' naja b'inchil ojtxix xb'len a kyxb'alintaq xjal te tnam Mam.

A jalin q'anchalxix noq tzenchaqu kyxb'alen xjal ex nimxix toj tkayb'itz ex tzuntzin nchi loq'en kyxb'alen teyala junxil tnam te junxel qyajil.

Tzmaxipin jalin a toklin kyxb'alin qya cheb'aqu ma jaw q'anchlex juntl maj kyunxix ku'xen txin ayi nchi xnaqtzin kyib'. A nimxix toklen te kye ajxnaqtzil mo te ja xnaq'tzb'il te tnam te Txolja, tzuntzin nchi ipen kyb' ja tu'n mina kub' naje twutz kyipel ex tu'n txi onetxix twutz toklen qyajil te tnam Mam te Txolja. Jotxsin jni' lu'n o q'anchalix tojele junjen nim q'ij, twutz ky-yek'b'il k'wal twutz tnam te Txolja ex nim q'ij b'inchenku kyu'n ajxnaqtzb'il toj junjela ja te xnaq'tzb'il, kye k'wal, ku'xen, ex aye skwelil nchi b'antzin kyb' tu'n tetz b'an kyxnatzb'il ex q'anchalxix toklen ojtxix xb'alen kyu'n tx'i nchi skwelen te mala ex aya o chi japen te mala.

Q'OLB'IL

A q'olb'il tb'anilxix toklen te jun tb'anel tnimel ex tnab'x te junjen xjal exsi cheb'aku nimenku kyu'n.

Q'anchalxix kye aya tij xjal tzunxsin nkub' kyxnaqtzin twutz q'olb'in tzenkux twutz q'olb'en a kyij q'on ojtxixixwen kyu'n qchman ex cheb'aku nimenkuxix kyu'n, tzuntzin n-oken kyu'n jalin noq te alkye jun xjal ojtzqinxix, me tzenkuxixjo n-el kyk'ulb'en kyib' tuk'a jun tij xjal mo jun tb'anel xb'oj, kompala, xjal a at toklen te, ex txqantl. jotxsin jnilexjo lu'n tzuntzin nxi' yek'en kye tal mu'xh k'wal toj kyja tu'ntzin mina naja twutz q'olb'in.

Wenxix tu'n txi uxet kye at kab'a tumel tzenxix tu'n q'olb'et tzuntzin nkub' pak'b'et kyjalu'n:

a). A ojtxix wen aye tij xjal tuk'a tij xjal (qya mo ichin) tzuntzin n-ok kymujb'en tman kyq'ob' tzuntzin nchi kub' k'we', n-oktzin kymujb'en tuk'a kyplaj te jun nim amb'il te ka'a minut exsin nchi jaw qanen tzenxix iteye jnixjo xjal najle kyja (tzuntzin njaw kyqanen kyb'i junjen tb'i xjal najla tojela kyja) tzenxix xhi sqixe toj kynimmil, kynab'l, qa nti' yab'il ex txqantl. exsin aj tel b'aj kyq'olb'en tzuntzin n-el kymatzin kyq'ob' exsin b'ex nel kytzaqpin kyq'ob'exsin kxe'l kyqanexix tzenxix taya tchwinqel junjen xjal najla toj ja, mejqa mina ok chi jaw yolin tib'aj jun yol a nimxix token te kytanmen mo a nimx tu'n token te kyex.

b'). Aye tzin tal muxh k'wal, ilxixtaq ti'j tu'n kyq'olb'en te jun tij xjal alchaqkyex xjaltz ex mi txi kayitxix alkyexix tyajil ajqa at toklen kye me nimxix toklen q'olb'en te kye.

A tal k'wal nxi' tq'on tman tq'ob' tu'n tq'olb'en exsin k'wel k'we' twutz tij xjal, ex ante tij xjal kxe'l tq'on tq'ob' exsin pon ti'n tib'aj twi' k'wal, jun yekb'iltzin ja tu'n tkub'a ky'iwlena jun yek'b'il ja k'wela chiky'b'et twutz q'olb'en.

A jalen nimxex b'is kye a twutz ojtxix q'olb'en cheb'aku ma kub' naj noq tu'n at juntl kykayb'etz xjal ex junxi xmayenqek ex iky'enqek xjal ti'j kyq'olb'en ex ikyxjo tzuntzin n-oken jalen a tq'olb'en kyxhtyan mo tq'olb'en mo's a mikyxixjo tzenku kyq'olb'in qxjalil te tnam te Txolja, q'anchalxix kye nimxix xjal Mam jun paqx nchi q'olb'en tb'aj ojtzix q'olb'enq'onj kyu'n qchman atku junjen maj mina npon kanen kyq'ob' tib'aj twi' ajq'olb'el, qapa tu'n kytx'ixwe mojqa tu'n cheb'aku ma kub'naj a toklen q'olb'en te tnam, atku n-ok kayet kyi'j ku'xen ja n-okene junxil kyq'olb'in b'anqala tzun n-ok kykayen ti'j junxil tnam, q'anchalxix ja n-oke kymujb'en kyq'ob', atku nim maj n-ok kymiso'n kyq'ob' atku noq ayix ku'xen ojtzqlte b'anqala teyela junjen ku'xen mina kyijtzqi'n toklen txilnen, q'olb'en el kyxmayin ti'j ku'xen tx'u'j.

Noqxix ja'lin nimxix xjal tzuntzin n-oken tq'olb'in mo'x kyu'n, aja ajq'oxixwen noqx ja tzenku: ja te tnam, ja toj xnaq'tzb'il, te mu'xh k'wal, kye' ku'xen, ex kye nim xjal. Me q'anchalxix tzenku aj tjapin b'aj jun toj txnaqtzin jun xjal mo aj tch'iy twutz tpwaq mo atch'in tpwaq txolila tnam.

CHUJ.

A twutz chuj jun tx'ajb'il qi'j a kyij kyq'on qchman, a ja nimxix toklen ex nimxix ntq'anen kye tnam Mam.

a). Tzen tb'inchajtz jun chuj.

Aye kyajxix ti'j chuj tzuntzin n-kyb'inchen kychuj, exsin tzun njaw kyb'inchen kyjalun.

Oktzin k-okel jyet tb'anel tz'otx', a tb'anilxix wen ex ja mina aku kub' yuchja tu'n kyaqnenjanb', ex nim kyq'iq'. Tzuntzin nxi b'inchet loq' b'inchenku te xoq'l ja cheb'aku k'wel xoq'tzit, tuk'a nimxix a' ex kx'el ch'in txaq tzaj toj mo ch'in ch'umj tu'ntzin mina kub' paxa loq'exsin b'ex kxel smet tuk'a xoq'l, k'welix q'uq'b'et xoql toj laq te loq' exsi b'ex k'wel tx'ilset tjaq' q'ij toj jun seman, ajtzin tzqij loq', b'exsink-okel tu'n tjaw b'inchet chuj tu'ntzin tok xikyb'et il tij tu'n tkub' b'inchet chÅfin xoq'l tu'n tjaw b'inchet ex cheb'aku kxet tumel te jun chuj te jun nikyjen toj q'ob'aj tw'alil ex oxe toj q'ob'aj txhqinal. A tib'aj chuj ok k'okel mujb'et tuk'a txqan tq'ob' tze ex mujlexix tten ja tu'n tweya xoq'l tib'aj, exsin b'ex kxe'l b'inchet jun tal tpach tu'n mina tz'aka tu'n jb'al.

A tojxi chuj at oxe mo kyaje tz'lan toj ja tu'n qkub' kyxheya, jun tal jul b'inchenku te tb'anl ja tun tok ktxeta q'aq' ex tb'anel ab'j ja mina laqja tu'n q'aq', exsin tze'n n-okx chuj ok k-okel txikyb'el jun k'wil a' t-txlaj q'aq' kab'a laq ja tu'n tkubÅfa b'incheta tx'ajb'il mo ja tu'n tel b'aja tx'ajb'il qi'j.

A penxi te chuj, atzin tjpel oj ktxetel tu'ka b'uxh xtanik tu'ntzin mna tz'etza txb'akxel chuj nb'eqaja tojxe chuj.

Tuntzin qniky'b'en a t-txutxjel chuj ilxix ti'j tu'n tel t-txan si, ex noq tu'n tkyijxixtb'anil q'aq', me ilxix ti'j tu'n tu'n tokx weky, tuntzin tpon kanen txb'akxemel q'aq'tib'aj ajchujel tu'ntzen tetz lijo'n jnilexjo yab'il tokx toj chib'jel ajtzin t-sikyta b'esin k'el tb'incehn ta' ja tu'n telk txjete ti'j.

A twutz chuj toklen te kye jni'qe qyajil ex te kye jni' xjal tal tu'n tlonte mo tu'n tokx toj.

Jotxsin jni' qyajil maya Mam ntmaq'tzin tib' tojo tb'anil chuj a nimxix token te kye jni'qe xjal te tnam Mam. Wenxix tu'n txi q'met kye aye xjal nchi oksen chuj ayetzin te kob'el tx'otx'te tnam ex ayetzin xjal te toj tnam noq jun jteb'en aye nchi okxen tiÅfjo tb'anel chuj.

A tb'nel chuj tzuntzin n-okx xqet noqx alkye q'ale te seman, me ikyxjo kye te nimxix xjal n-okx txqet tchuj te junjen qala te sab'l te jwe' niky'jen qale tzmax wajxaq niky'en te qniky'in, amb'il ja n'aq'leqexjal tu'n kyox chujel. Ajtzin kyetzxjal chujal bÅfexsin chi xe'l ktal ja tu'n kyajlana wen.

QANMIL CHUJ.

A chuj tb'anlexixiwen tu'n tel yab'il qu'n o tz'elxix kyniky'xal te kye tb'anel ntq'anen: tzenku xkyaqlenchej, tu'n tech lejo'n che'w toj chib'jal, xjos, sulpi'ch, en ti'n tcho'n chib'jal, ch'on k'ub'aj.

CHB'ILEN CHUJ

Atzin toklen chuj jun yek'b'il kyij q'on kyu'n qchman kye a chu' tb'anelxix te q'anmel yab'il te kye kyk'al, atzin tzajnexix atxix ojtxix exsin tzunxsin n-oken ja'len, tzuntzin ntzaj yolin kye a chuj at tajwe, a n-mojen te jni xjelb'etz nxi qanet tzen aj txi' tnejel q'aq' ex qa nimxix qanmetz a ajchel tzuntzin n-olen tu'n tonen te jni' qanmetz:

Tzuntzin nxi qanet txqan ipel tu'n tel elsit noqx alkye aq'untl, tzuntzin nxi qanet tu'n mina chi yab'te, tzuntzin nxi' qanet txqan tpj nab'l, exsin nxi qanet tu'n mihc chi el jipaj tib'aj kyaq'en, exsin txqan kyxhtijb'el ex txqantl.

Atzin chuj nimxix toka te q'anmetl kye iky'chuj, qu'n te kye tnam Mam timxix txilnen ex toklen ja n-mojena toj tchwinqel qya iky' chujel toj tnamb', ex toj jotx jni' tten.

NAB' NIMAL TE JUNJEN AB'QE

TQ'IJEL CHMAN.

A tq'ijel chman tzuntzin nkub' iky'set te tnejel q'ij te b'eljaj xjaw noviemb're. A tnimel ojtxix qxjalil Mam tzuntzin nkub' kyq'man kye aya kyimnen tzuntzin nchi etz ja miq'unqexe a tze'n ch'ixtaq tpon kanen tq'ijel chman; tzuntzin nq'umb'lajtz kye aye kyimnen nchi ex lolte kyanmen aye itz'qe, ex tzuntzin nkub' q'man kye nchi etz pasyalil ex nche'x lote a kyaq'en a kub' kyb'inchenxix wen te itz'qetaq twutz tx'otx'.

Ex ikyxjo ajq'ojxix kyu'n xjal kye aye kyimnen tzuntzin nchi tok'chin te chq'alxix me ajq'ojxix tzenku toj qniky'in, ajqa tajxixtaq qtzan kyimnen ti'j taq'en ajq'ojxixsin tzenku nkub' tok'xhin mo nkub' yekb'in jniqe tmakb'el xhi kyij, tzenku tz'inex ajq'oxix tzenku ntok'chin tanmin kyimnen ti'j tjpel ja me noq tzenxtaq taq'en. Tzuntzin nq'umb'laj kye a tanmen kyimnen tzuntzin pasyalen.

Junxil tumel nkub' q'man kye tze'n aj tkyim jun xjal exsin noq xtk'ulb'en il exsin nam tjapin toj tq'ijel tkyimen tzuntzin kyij tanmen toj b'is ex atku ok ky-kyimel txqal xjal jaxjo xkyima tnejil kyimne mo ja xk'ulb'ene il. Atzin jni lu'n tzuntzin ntzaj yolin kyu'n xjal exsin nq'manj kyu'n qchman.

Ex tzun nkub' yolin a tze'n chixtaq tpon kanen tkyimen jun xjal qu'n tzuntzin k-okel ten oqxenilte jnixjo at te exsin k-okel tojqxenen at te, te jun xjal a tajxix ti'j mo jun xjal ja q'uqlexix tk'uj ti'j, me ikyxixjo b'exsin k-okel ten kanel jnilexjo taj ex ajtzin aj tkyim oktzin kxel jnilexjo kub' tqanen tej itz'taq ja k'wela tchinma (chnab', mo chonq'itzin), oktzin kxe'l ch'in tk'wa', ex te twa ex axixjo kyniky'b'el ojtzqi'n tu'n tnam. Jotxsin jnilexjo kub' tqnen oktzin kel te toj tq'ijel chman, mo aj tiky'sin tab'qa mo tab'qe te q'ij te tkyim.

Tumpitzintzjo tze'n pon kanen tq'ijel kyimne mo tq'ijel chman, joxsin jni' xjal nxi' k'ayel junjen tkyimnen toj twi' chman tzuntzin nxi' kyi'n kywa kyimnen, tzenku: sub'en wab'j, chawen, i'xh tzq'ajxen, twutz txan tzq'ajsen, ajqa tajtaq kyimnin tk'wa q'en oktzin kxe'l ch'in tk'wa q'en mo tsich' exsin kxe'l tb'anel tchinme a n-okenxix kyu'n xjal te tanm, exsin kxe'l jun jteb'en tkandel, jun yek'b'il ja mujleqe kyten atku junjen maj ok kxe'l insiens exsin chi okel ten yolil toj kynimel ex atku nchi yolin tjaqÅf kyoq'len kye b'anxix kyten. Me tze'n namxtaq tpon kanen tq'ijilxix chman tzuntzin nxi' petb'et tu'n txi' uk'set mo tu'n tel tz'is tib'aj tkub'el, exsin kxe'l uk'xet tuk'a tb'anel tkayb'el exsin kxe'l b'inchet tuk'a tb'anel b'ech, tkorona kyimna extzin kxe'l iqet txaq txaqtzaj te k'ok'selte.

A tq'ijel chman, jotxsin jni' xjal nche'x lolte ky-kyimen noqx aj tjaw spiky'e' me ayixixjo xjal najleqe naqchaq ex nya'xix nimx xjal aye nchi pon kanen q'olb'el kyimne, me ajtzin tok qale ex te qniky'in b'anxixtzin tu'n tok qka'yin txqanxix xjal aye nche'x kayilte ky-kyimnen te toj tnam te Txolja ex te kojb'el tnam ja ata twi' chman.

A jalen q'anchalxix toklen ex taq'men jniqe nimel xjal katolik ayetzin nchi na'n Dios tib'aj kyimnen aj tzaj q'man jun kyaq'en ex noq alkye taj tu'n tnayet Dios tib'aj tkyimnen texix tq'ijle chman, a q'nchalxix nimil katolik tzunxix nchi tzalaj tu'n kyb'itzin exsin nchi yolin tib'aj tb'i Dios exsin chi jaw kytx'ixpen kyib' u'n kyaq'nen qu'n tu'n mojenqe tu'n Pala te tnam.

Q'anchalxix a nimxix xjal nkub' meje twutz tkub'el jun kyimnen, jun yek'b'il ja ma chi pn kanena kyjayel ka'yilte kyimnen.

NAB'L B'ETIN TI'J TK'WAL DIOS

A na'b'l b'etin ti'j tk'wal Dios toj tnam te Txolja iky'sintzin toj xq'anq'ij, ja nimxix txqan xjal n'ex na'b'lte ex n-ex b'etilte twutz tojela nim txolile b'e te tnam te Txolja ex q'anchalxix kyb'eten xjal aye tzajneqexix te toj kojb'el te tnamex tzenkuqe xjal te junxel tnam npon kanen ka'il tojxix tq'ijel xq'anq'ij.

Jotxsin jni' xjal cheb'akutzin nimen ex cheb'aku k'ulen kyb'etin qu'n tu'n cheb'aku nchi ximen tib'ajo jni' qtzajel q'ma'n a tzenxix oka tchwinqel ex tkyimen tk'wal Dios. A kyb'etb'en xjal oktzin k-okel qka'yen tilb'al tk'wal Dios tuk'a tyuxh tib'aj jun tij tq'uqel ja nci okxa txqan xjal tjaq' b'anqala lajaj toj oxk'al ichin ex tuk'a txqan tuk'sel ex tb'inchb'en kyu'n xjal mojel toj tja Dios katolik. Exsin toj junxil b'e n-exa tilb'al tnana k'wal Dios exsin k'len kyun txqan qya ja k-okel kymujb'en kyib' tuk'a tk'wal Dios exsin junx ky-kyaqilx chi okex toj tja Dios katolik, me nimxixtaqtzin otaq kub' kyb'etin.

Aj tok qniky'in tzuntzin n-ok qka'yen telnex nab'l miqub'elte tk'wal Dios txolele b'e te tnam te Txolja.

TQ'IJEL K'AYB'EL

A tq'ijel k'ayb'il jun nim q'ij kye twutz tnam te Txolja exsin tzuntzin nkub' iky'xet tojele junjen domink ja jotx jni' twutz kojb'el te tnam npon kanen iky'xilte ex nimx nchi pon kanen k'ayel toj tq'ijel, loq'el, jun q'ij ja nchi exa xjal pasyalil, junxil xjal njaw kypan amb'il tu'n kyxi' na'l Dios tojela junjen kynimel ex junxil n-ok kychmo'n kyib' tu'n tkub' nik'et twutz tnam ex ja tu'n tjaw tx'ixpet kynab'l, ky-yolb'il, ky-chwinqel ex txqantl. A tq'ijel k'ayb'il jun q'ij tb'anilxix ja nchi jaw yolinexjal tuk'a kyxb'oj, kyuk'a a b'inchel twutz tnam ex ja nchi jaw yolina tuk'a junxel xjal te junxel kojb'el te tnam ex xjal te junxil tnam a iqaku ite'ya te tnam exsin nchi pon kanen toj tnam.

Ex ikyxjo at jun tq'ijel mu'xh k'ayb'il toj tnikyjel seman, myerkoles a ja nche'xi xjal loq'el mu'xh kyloq'en te twutz tnam, qu'n tu'n nimxix aq'untl kye xjal tejo q'ij ikyjo, tu'ntzin junjteb'en xjal npon kanen toj k'ayb'il mo tejo q'ij ikyjo.

Sobre Autores:

Walter Olrando Pérez Morales (1969- , Comitancillo, San Marcos, Guatemala)

*********************************************************

Mitzub'ixi Quq Chi'j (1956- , Cuidad de Osaka, Osaka, Japón)

Derechos Reservados, Walter y Mitzub'ixi, 2008